ခရီးသည်တင်ယာဉ်ဘတ်စ်ကားမောင်းနှင်တဲ့ YBS ယာဉ်မောင်းများအနေဖြင့် စည်းကမ်းမလိုက်နာပါက Smart Card နှင့် ကညနလိုင်စင် ဖျက်သိမ်းမည်ဖြစ်ကြောင်း ရန်ကုန်တိုင်းဒေသကြီးပုဂ္ဂလိက သယ်ယူပို့ဆောင်ရေး ကြီးကြပ်မှုကော်မတီ (YRTC)မှ သိရပါတယ်။ YBS ယာဉ်မောင်းများအနေနဲ့ စည်းကမ်းမဲ့ မဆင်မခြင် မောင်းနှင်ခြင်းမျိုးရှိပါက ယာဉ်မောင်း Smart Card ကို ဖျက်သိမ်းမည်ဖြစ်ပြီး ကညနယာဉ်မောင်းလိုင်စင်ကိုလည်း အချိန်ကာလတစ်ခုအထိ သတ်မှတ်၍ ပိတ်သိမ်း အရေးယူသွားမှာဖြစ်ပါတယ်။ YRTC ၏ မှတ်တမ်းများအရ ယခုလတွင် မီးနီဖြတ်မောင်းသူ ၁၁ ဦး၊ ယာဥ်ကျော်တက်သူ ၁၉ ဦး၊ မီးပွိုင့်မှာ လူတင်/ချသူ ၃ ဦး၊ ဘေးတံခါးဖွင့်မောင်းသူ ၄၇ ဦး၊မှတ်တိုင်တွင် စနစ်တကျမရပ်သူ ၃ ဦး၊ မှတ်တိုင်တွင် အချိန်ကြာ မြင့်စွာရပ်သူ ၇ ဦး၊ သတ်မှတ်စတစ်ကာမပါသူ ၁ ဦး၊ ကီလိုကျော်အရှိန်ပြင်းစွာမောင်းနှင်သူ ၇ ဦးနှင့် ဘရိတ်စောင့် နင်းသူ ၂ ဦး စုစုပေါင်းစည်းကမ်းဖောက်ဖျက် YBS ယာဉ်မောင်း ၁၀၀ ဦးအထိ ရှိခဲ့တယ်လို့ သိရပါတယ်။ ရန်ကုန်မြို့မှာ YBS ခရီးသည် ၁ ဒသမ ၅ သန်းခန့်ကို ယာဉ်မောင်း ၄,၀၀၀ ဦးခန့်က နေ့စဉ်ပို့ဆောင်ပေးနေပြီး YBS ယာဉ်မောင်းများရဲ့ စည်းကမ်းဖောက်ဖျက်မှုကို YRTC က Traffic Control Center မှ နည်းပညာမြင့် Telematics စက်‌များ၊ CCTV record များဖြင့် မှတ်တမ်းရယူ၍ အရေးယူဆောင်ရွက်လျက်ရှိတယ်လို့ သိရပါတယ်။ (NVS 003)