တိုင်ဖွန်းမုန်တိုင်းရာဂီကြောင့် မိုးသည်းထန်စွာရွာသွန်းပြီး ရေတိုက်စားမှုများကြောင့် ပျက်စီးသွားခဲ့သည့် မန္တလေးတိုင်းဒေသကြီး၊ ဝမ်းတွင်းမြို့နယ်အတွင်းရှိ စမုံနှင့်သပြေတောင်းအကြား အဆန်ရထားလမ်း တံတားအမှတ် (၆၉၁)ကမ်းကပ်ခုံရေတိုက်စားခံရ၍ ပေ ၆၀ ဘေလီသံပေါင်ဖြင့် ယာယီအစားထိုးဆောင်ရွက်ခဲ့ပြီး ယခုအခါ အသေးစိတ်ပြင်ဆင်မွမ်းမံမှုများ ပြုလုပ်ရန်လိုအပ်မှုကြောင့် နိုဝင်ဘာလ ၁၈ နှင့် ၁၉ ရက်တို့တွင် မန္တလေး-သာစည် ရထားလမ်းပိုင်းအား ယာယီပိတ်ထားမည်ဖြစ်ကြောင်း သိရပါတယ်။ အဆိုပါ နေ့များတွင် သာစည်-မန္တလေးပြေးဆွဲပေးလျက်ရှိသည့် အမှတ် သ-၃၀၁ အဆန်၊ သ-၃၀၂ အစုန် RBE လူစီးရထားနှင့် ရန်ကုန်-မန္တလေး-ရန်ကုန်ပြေးဆွဲလျက်ရှိသည့် အမှတ်(၁)အဆန်၊ အမှတ်(၂)အစုန် စာပို့ရထားများကို ယာယီရပ်နားထားမည်ဖြစ်ပြီး ရန်ကုန်-မန္တလေး-ရန်ကုန် ပြေးဆွဲလျက်ရှိသည့် အမှတ်(၁၁)အဆန်၊ အမှတ်(၁၂)အစုန် လူစီးအမြန်ရထားများကို ရန်ကုန်-သာစည်-ရန်ကုန်ခရီးစဉ်အဖြစ် ပြောင်းလဲပြေးဆွဲသွားမည်ဖြစ်ကြောင်း မြန်မာ့ မီးရထားမှ သိပါတယ်။ စမုံနှင့် သပြေတောင်းကြား အဆန်လမ်း တံတားအမှတ်(၆၉၁) စမုံတံတားအား အသေးစိတ်ပြုပြင်မှုများ ဆောင်ရွက်ပြီးသည့် နိုဝင်ဘာလ ၂၀ ရက်မှစ၍ ရန်ကုန်-မန္တလေးလမ်းပိုင်းအတွင်း ပြေးဆွဲလျက်ရှိသော ရထားများကို မူလပြေးဆွဲချိန်များအတိုင်း ရန်ကုန်နှင့်မန္တလေးခရီးဆုံးဘူတာများအထိ ပုံမှန်ပြေးဆွဲပေးမှာြဖစ်ပါတယ်။(NVS 008)