“ဇလွန်ပြည်တော်ပြန်ဘုရားတွင် (၅၃) ကြိမ်မြောက် မသိုးသင်္ကန်းတော်မြတ် ရက်လုပ်ကပ်လှူပွဲနှင့် တန်ဆောင်တိုင်မီးထွန်းပွဲ ကျင်းပမည်”
13 Nov
ဧရာဝတီတိုင်းဒေသကြီး၊ ဇလွန်မြို့ရှိ မာရ်အောင်မြင် ပြည်တော်ပြန်မြတ်စွာဘုရားတွင် (၅၃) ကြိမ်မြောက် မသိုးသင်္ကန်းတော်မြတ် ရက်လုပ်ကပ်လှူပွဲနှင့် တန်ဆောင်တိုင်မီးထွန်းပွဲကို နိုဝင်ဘာလ ၁၄ ရက်မှ ၁၇ ရက်အထိ စည်ကားသိုက်မြိုက်စွာ ကျင်းပသွားမယ်လို့ သိရပါတယ်။ မာရ်အောင်မြင် ပြည်တော်ပြန်မြတ်စွာဘုရားရဲ့ မသိုးသင်္ကန်းရက်လုပ်ပူဇော်ပွဲကို နိုဝင်ဘာလ ၁၄ ရက်မှာ စတင်ရက်လုပ်ပူဇော်သွားမှာဖြစ်ပြီး ကိန္နရီစင်တော်၊ သမ္ဘူလစင်တော်၊ မယ်မဒ္ဒီစင်တော်နှင့် အမရာစင်တော်များက ရက်လုပ်ကြမှာ ဖြစ်ပါတယ်။ တန်ဆောင်မုန်းလပြည့်နေ့ နံနက် ၄ နာရီမှာ မာရ်အောင်မြင်ပြည်တော်ပြန် မြတ်စွာ ဘုရားနှင့် ဂန္ဓကုဋိတိုက်အတွင်းရှိ ဗုဒ္ဓရုပ်ပွားဆင်းတုတော် သုံးဆူတို့ကို မသိုးသင်္ကန်းပူဇော်မှာဖြစ်ပြီး တန်ဆောင်တိုင် မီးထွန်းပွဲအဖြစ် မာရ်အောင်မြင်ပြည်တော်ပြန်မြတ်စွာဘုရားကြီးရဲ့ ကိန်းဝပ်စံပယ်ရာ ဂန္ဓကုဋိတိုက်တော်ကြီးနှင့် ဝန်းကျင်နေရာများမှာ လျှပ်စစ်ရောင်စုံမီးများ၊ ဆီမီးများနဲ့ ဆီမီးပူဇော်ပွဲလည်း ကျင်းပသွားမှာ ဖြစ်ပါတယ်။ (NVS 004)
