မေဂျာလိဂ်ပြိုင်ပွဲရဲ့ တစ်ရာသီအကောင်းဆုံးဆုအတွက် နောက်ဆုံး(၅)ယောက် ဆန်ခါတင်စာရင်းမှာ အင်တာ မိုင်ယာမီအသင်းရဲ့ တိုက်စစ်မှူးတွေဖြစ်တဲ့ မက်ဆီ နဲ့ ဆွာရက်ဇ်တို့ ပါဝင်ခဲ့ကြပြီး အကောင်းဆုံးဆုရဖို့ ထိပ်ဆုံးက ရေပန်းစားနေပါတယ်။ မက်ဆီ နဲ့ ဆွာရက်ဇ်တို့ နှစ်ယောက်လုံးဟာ အခုဘောလုံးရာသီမှာ အင်တာမိုင်ယာမီ အသင်းအတွက် ခြေစွမ်းပြနိုင်ခဲ့တာကြောင့် တစ်ရာသီအကောင်းဆုံးဆု ဆန်ခါတင်စာရင်းမှာ ပါဝင်နိုင်ခဲ့တာဖြစ်ပါတယ်။ မက်ဆီ က အခုဘောလုံးရာသီ မေဂျာလိဂ်ပြိုင်ပွဲမှာ ဒဏ်ရာပြဿနာတွေကြောင့် အနားယူခဲ့ရပေမယ့် အင်တာမိုင်ယာမီအသင်းအတွက် မေဂျာလိဂ် ၁၉ ပွဲ ကစားခဲ့ရာမှာ သွင်းဂိုး ၂၀ သွင်းယူကာ ဂိုးဖန်တီးမှု ၁၀ ကြိမ်အထိ စွမ်းဆောင်ပေးနိုင်ခဲ့ပါတယ်။ အခုရာသီမှ အင်တာမိုင်ယာမီအသင်းကို ပြောင်းရွှေ့လာခဲ့တဲ့ ဆွာရက်ဇ်ကလည်း အသင်းအတွက် မေဂျာလိဂ် ၂၇ပွဲ ကစားခဲ့ရာမှာ ဂိုး ၂၀ သွင်းယူကာ ဂိုးဖန်တီးမှု ၉ ကြိမ်အထိ စွမ်းဆောင်နိုင်ခဲ့ပါတယ်။ မက်ဆီ အနေနဲ့ ပြီးခဲ့တဲ့ဘောလုံးရာသီကလည်း မေဂျာလိဂ်ပြိုင်ပွဲရဲ့ တစ်ရာသီအကောင်းဆုံးဆု ဆန်ခါတင် စာရင်းမှာပါဝင်ခဲ့သလို အခုရာသီမှာ အသင်းနဲ့အတူ မေဂျာလိဂ် Supporters’ Shield ကို ရယူနိုင်ခဲ့တာကြောင့် ဆန်ခါ တင်စာရင်းမှာ ထပ်မံပါဝင်လာခဲ့တာဖြစ်ပါတယ်။ မေဂျာလိဂ်ပြိုင်ပွဲရဲ့ တစ်ရာသီအကောင်းဆုံးဆုအတွက် နောက်ဆုံး(၅)ယောက် ဆန်ခါတင်စာရင်းမှာ မက်ဆီ၊ ဆွာရက်ဇ်တို့နဲ့အတူ ဟာနန်ဒက်ဇ်၊ အီဗန်ဒါ နဲ့ ဘန်တီကီ တို့လည်း ပါဝင်ခဲ့ကြပါတယ်။(NVS 008)