“အားကစားကလောင်ရှင်များ ချီးမြှင့်သည့်ဆုကို ရရှိခဲ့တဲ့ တန်ဟတ်”
22 Oct
အောက်တိုဘာလ ၂၀ ရက်က အင်္ဂလန်နိုင်ငံမှာပြုလုပ်တဲ့ အားကစားကလောင်ရှင်များအစည်းအရုံးရဲ့ ညစာစားပွဲ အခမ်းအနားမှာ မန်ယူအသင်းရဲ့နည်းပြ တန်ဟတ်က အားကစားကလောင်ရှင်တွေက ပေးအပ်ချီးမြှင့်တဲ့ အကောင်းဆုံး ဆုကို ရယူနိုင်ခဲ့ပါတယ်။ တန်ဟတ် ဟာ ပြီးခဲ့တဲ့ဘောလုံးရာသီက မန်ယူအသင်းကို အက်ဖ်အေဖလားရရှိအောင် စွမ်းဆောင်ပေးနိုင်ခဲ့တာကြောင့် အားကစားကလောင်ရှင်တွေက ပေးအပ်တဲ့ဆုကို ချီးမြှင့်ခံခဲ့ရတာ ဖြစ်ပါတယ်။ မန်ယူအသင်းဟာ ပြီးခဲ့တဲ့ဘောလုံးရာသီက အက်ဖ်အေဖလား ဗိုလ်လုပွဲစဉ်မှာ မန်စီးတီးအသင်းနဲ့ တွေ့ဆုံခဲ့တာဖြစ်ပေမယ့် ၂ ဂိုး၊ ၁ ဂိုးနဲ့ အနိုင်ရရှိအောင် စွမ်းဆောင် နိုင်ခဲ့တာကြောင့် အက်ဖ်အေဖလား ချန်ပီယံဆုကို သိမ်းပိုက်နိုင်ခဲ့တာ ဖြစ်ပါတယ်။ ပြီးခဲ့တဲ့ဘောလုံးရာသီက ပရီးမီးယား လိဂ်ပြိုင်ပွဲမှာ အဆင့်(၈) နေရာမှာသာ ရပ်တည်နိုင်ခဲ့ပေမယ့် အက်ဖ်အေဖလားကို ရယူနိုင်ခဲ့တာကြောင့် မန်ယူအသင်း ဟာ အခုနှစ်မှာ ယူရိုပါလိဂ်ပြိုင်ပွဲဝင်ခွင့်ကို ရရှိခဲ့ပါတယ်။ (NVS 008)
