၂၀၂၃-၂၄ ဘောလုံးရာသီအတွက် အင်္ဂလန်တစ်နှစ်တာအကောင်းဆုံး ကစားသမားဆုကို ချဲလ်ဆီးအသင်း ကွင်းလယ်ကစားသမား ကိုးလ်ပါးလ်မာ က ရရှိသွားခဲ့ပါတယ်။ ဘောလုံးပရိသတ်တွေရဲ့ မဲပေးရွေးချယ်မှုမှာ ပါးလ်မာ ဟာ ဒုတိယနေရာက ဘယ်လင်ဟမ်နဲ့ တတိယနေရာက ဆာကာ တို့ကို ကျော်ဖြတ်ပြီး အကောင်းဆုံးဆုကို ရရှိသွားခဲ့တာ ဖြစ်ပါတယ်။ ပါးလ်မာ ဟာ ပြီးခဲ့တဲ့နှစ်နိုဝင်ဘာကမှ အင်္ဂလန်လက်ရွေးစင်အသင်းအတွက် ပထမဆုံး ပွဲထွက်ခွင့်ရခဲ့တာ ဖြစ်ပြီး လက်ရှိအချိန်မှာ လက်ရွေးစင်အသင်းအတွက် ၉ ပွဲအထိ ကစားပေးထားနိုင်ခဲ့တာ ဖြစ်ပါတယ်။ အသက် ၂၂ နှစ် အရွယ် ပါးလ်မာ ဟာ ၂၀၂၃-၂၄ ဘောလုံးရာသီ PFA အကောင်းဆုံးလူငယ်ကစားသမားဆုကို ရရှိထားသလို အခုရာသီ ပရီးမီးယားလိဂ်မှာလည်း ချဲလ်ဆီးအသင်းအတွက် ခြေစွမ်းပြကစားနိုင်ခဲ့သူ ဖြစ်ပါတယ်။ (NVS 008)