ဘာစီလိုနာအသင်းနဲ့ စပိန်လက်ရွေးစင်အသင်းတို့ရဲ့ ဂန္ထဝင်ကွင်းလယ်ကစားသမား အင်နီယေစတာ ဟာ ကစားသမားဘဝကနေ အနားယူတော့မယ်လို့ ပရိသတ်ကို အသိပေးလိုက်ပြီဖြစ်ပါတယ်။ အင်နီယေစတာ ဟာ အခုအချိန်မှာ အသက် ၄၀ အရွယ်ရှိနေပြီဖြစ်တာကြောင့် ဘောလုံးလောကကို စွန့်ခွာဖို့အတွက် ဆုံးဖြတ်ခဲ့တာ ဖြစ်ပါတယ်။ ကစားသမားဘဝကနေ အနားယူမယ့်အစီအစဉ်ကို အင်နီယေစတာက အခုလအစောပိုင်းကတည်းက ပရိသတ်ကို ဗီဒီယိုတင်ကာ အသိပေးခဲ့တာလည်း ဖြစ်ပါတယ်။ ဗီဒီယိုထဲမှာ အင်နီယေစတာက ကစားသမားဘဝ ကနေ အနားယူတော့မယ်လို့ ပြောကြားခဲ့သလို နည်းပြ ဂွါဒီယိုလာ အပါအဝင် သူ့ကိုကူညီပေးခဲ့ကြတဲ့ လူတိုင်းကို ကျေးဇူးတင်စကားကိုလည်း ပြောကြားခဲ့တာ ဖြစ်ပါတယ်။ အသက် ၁၂ နှစ်အရွယ်မှာကတည်းက ဘာစီလိုနာအသင်းရဲ့ အကယ်ဒမီကနေ ပေါ်ထွက်လာခဲ့တဲ့ အင်နီယေစတာ ဟာ ဘာစီလိုနာအသင်းအတွက် ပြိုင်ပွဲစုံပွဲပေါင်း ၆၂၀ ကျော် ကစားပေးခဲ့သူဖြစ်ပြီး ချန်ပီယံလိဂ် (၄)ကြိမ်၊ လာလီဂါ(၉)ကြိမ်အပါအဝင် ဖလားပေါင်းများစွာကို ဆွတ်ခူးပေးခဲ့သူလည်း ဖြစ်ပါတယ်။ အင်နီယေစတာ ဟာ သူ့ရဲ့ကစားသမားဘဝမှာ ဘာစီလိုနာအသင်းအပြင် ဂျပန်ကလပ် ဗစ်ဆယ်ကိုဘေး၊ UAE ကလပ် အမ်းမရိတ် ကလပ်အသင်းတို့မှာ ကစားပေးခဲ့ပါတယ်။ (NVS 008)