ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာနက ထိန်းသိမ်းထားသည့် ရေလှောင်တမံနှင့် ရေထိန်း တမံများ ကြံ့ခိုင်မှုကောင်းမွန်လျက်ရှိပြီး စိုးရိမ်ရန်မရှိကြောင်း စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ သိရပါတယ်။ ဒါ့အပြင် ပြည်ထောင်စုနယ်မြေ နေပြည်တော်မှာ ထိန်းသိမ်းထားသော ရေလှောင်တမံနှင့် ရေထိန်းတမံ စုစုပေါင်း ၁၂ ခုရှိပြီး စက်တင်ဘာလ ၂၉ ရက်မှာ ပေါင်းလောင်းရေလှောင်တမံမှာ ၃ ဒသမ ၉၀ ပေနှင့် ငလိုက်ရေလှောင် တမံမှာ ၀ ဒသမ ၁၀ ပေ ကန်ရေပြည့်အမှတ် အထက်ကျော်လွန်၍ ရေပိုလွှဲမှ ရေကျော်စီးဆင်းနေပြီး ယခင်နေ့နှင့် နှိုင်းယှဉ်ပါက ရေကျော်စီးဆင်းမှုအခြေအနေမှာ လျော့ကျလာကြောင်း သိရပါတယ်။ အလားတူ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနက ထိန်းသိမ်းထားသော ရေလှောင်တမံ ၂၄၆ ခု အနက်မှ ကန်ရေပြည့်မှတ် အထက်ကျော်လွန်၍ ရေပိုလွှဲမှရေကျော်စီးဆင်းနေသည့် ရေလှောင်တမံများမှာ ကရင် ပြည်နယ်တွင် ၁ ခု၊ ချင်းပြည်နယ်တွင် ၃ ခု၊ စစ်ကိုင်းတိုင်းဒေသကြီးတွင် ၂ ခု၊ ပဲခူးတိုင်းဒေသကြီးတွင် ၁၁ ခု၊ မကွေးတိုင်းဒေသကြီးတွင် ၁၁ ခု၊ မန္တလေးတိုင်းဒေသကြီးတွင် ၄ ခု၊ နေပြည်တော်တွင် ၂ ခု၊ မွန်ပြည်နယ်တွင် ၂ ခု၊ ရခိုင်ပြည်နယ်တွင် ၁ ခု၊ ရန်ကုန်တိုင်းဒေသကြီးတွင် ၃ ခု၊ ရှမ်းပြည်နယ်(တောင်ပိုင်း)တွင် ၂ ခု၊ ရှမ်းပြည်နယ် (မြောက်ပိုင်း)တွင် ၁ ခုနှင့် ဧရာဝတီတိုင်းဒေသကြီးတွင် ၄ ခု စုစုပေါင်း ၄၇ ခုရှိပြီး ယခင်ရေကျော်ခဲ့တဲ့ ရေလှောင်တမံ ၅၀ ခုထက် ၃ ခု လျော့နည်းသွားခဲ့ပါတယ်။ အဆိုပါရေလှောင်တမံများရဲ့ ကြံ့ခိုင်မှုအခြေအနေမှာ ကောင်းမွန်လျက် ရှိပြီး တာဝန်ကျဝန်ထမ်းများကို ၂၄ နာရီ ရေကင်းတာဝန်ချထားကာ အနီးကပ်စောင့်ကြပ် စစ်ဆေးလျက်ရှိတာကြောင့် စိုးရိမ်ရန်မရှိဘူးလို့ သိရပါတယ်။ (NVS 003)