တရုတ်အိုးပင်း ပထမအဆင့်မှာ နိုင်ပွဲရခဲ့တဲ့ ဆင်နာ
28 Sep
တရုတ်နိုင်ငံ၊ ပေကျင်းမြို့မှာ ကျင်းပနေတဲ့ တရုတ်အိုးပင်းတင်းနစ် အမျိုးသားတစ်ဦးချင်း ပွဲစဉ်မှာ လက်ရှိ ချန်ပီယံ ဆင်နာ က ဒုတိယအဆင့်ကို တက်ရောက်သွားခဲ့ပါတယ်။ ကမ္ဘာ့အဆင့်(၁)မှာ ရပ်တည်နေသလို အခုလ အစောပိုင်းကမှ ယူအက်စ်အိုးပင်းချန်ပီယံဆုကို ရယူထားခဲ့တဲ့ ဆင်နာ ဟာ တရုတ်အိုးပင်း ပထမအဆင့်မှာ ချီလီ နိုင်ငံသား ဂျာရီ နဲ့ ယှဉ်ပြိုင်ခဲ့ရတာ ဖြစ်ပါတယ်။ ပထမပွဲလတ်မှာ ဂျာရီ က အနိုင်ရခဲ့တာကြောင့် ဆင်နာ အနေနဲ့ ချန်ပီယံဆုကို ကာကွယ်နိုင်ဖို့အတွက် အခက် အခဲနဲ့ ရင်ဆိုင်ခဲ့ရပြီး ဒုတိယပွဲလတ်မှာ နိုင်ပွဲပြန်ရခဲ့လို့သာ မျှော်လင့်ချက် ဆက်ရှိခဲ့တာဖြစ်ပါတယ်။ တတိယ ပွဲလတ်မှာတော့ ဆင်နာရဲ့လက်စွမ်းက အပြတ်အသတ်အသာရခဲ့ပြီး ပွဲအပြီးမှာတော့ ဆင်နာ က (၄း၆၊ ၆း၃၊ ၆း၁)ဆိုတဲ့ရလဒ်နဲ့ အနိုင်ရခဲ့ပြီး ဒုတိယအဆင့်ကို တက်ခွင့်ရသွားခဲ့တာဖြစ်ပါတယ်။ ဒုတိယအဆင့်မှာတော့ ဆင်နာ ဟာ ရုရှားတင်းနစ်သမား ဆာဖီအူလင် နဲ့ယှဉ်ပြိုင်ရမှာ ဖြစ်ပါတယ်။(NVS 008)
