ရော်နယ်ဒို ရဲ့ မှတ်ချက်ပြုမှုကို ပြန်လည်တုံ့ပြန်ခဲ့တဲ့ တန်ဟတ်
14 Sep
မန်ယူအသင်းအနေနဲ့ အောင်မြင်မှုတွေရဖို့အတွက် အစကနေ ပြန်လည်တည်ဆောက်ဖို့ လိုအပ်တယ်လို့ ပြောခဲ့တဲ့ တိုက်စစ်မှူးဟောင်း ရော်နယ်ဒို ရဲ့မှတ်ချက်ပြုမှုကို မန်ယူနည်းပြ တန်ဟတ် က စက်တင်ဘာလ ၁၂ ရက်မှာ ပြန်လည်တုံ့ပြန်သွားခဲ့ပါတယ်။ ရော်နယ်ဒို ဟာ သူ့ရဲ့ကိုယ်ပိုင်ယူကျုချန်နယ်မှာ ပြီးခဲ့တဲ့ရက်ပိုင်းက မန်ယူအသင်းနဲ့ ပတ်သက်ပြီး သူ့ရဲ့အမြင်ကို ပြောကြားခဲ့တာဖြစ်ပါတယ်။ ရော်နယ်ဒို က မန်ယူအသင်းကို ပရီးမီးယားလိဂ်ဖလား မရနိုင်ဘူးလို့ ပြောခဲ့တာဖြစ်ပေမယ့် အခုအချိန်မှာ သူကမန်ယူအသင်းရဲ့ အဝေးမှာရှိနေပြီဖြစ်တာကြောင့် သူ့ရဲ့အမြင်ကိုလည်း ပြောပိုင်ခွင့်ရှိတယ်လို့ မန်ယူအသင်း နည်းပြ တန်ဟတ် က ပြောခဲ့ပါတယ်။ သို့သော်လည်း ဘောလုံးရာသီသစ်က အခုချိန်မှ စတင်တာဖြစ်လို့ အသင်းရဲ့ ရလဒ်တွေအပေါ် ပြောဖို့စောလွန်းနေသေးပြီး စောင့်ကြည့်သွားဖို့ လိုအပ်တယ်လို့ တန်ဟတ် က ဆက်လက် ပြောကြားခဲ့ပါတယ်။ မန်ယူအသင်းဟာ လက်ရှိဘောလုံးရာသီ ပရီးမီးယားလိဂ်မှာ ၃ ပွဲ ကစားပြီးချိန်မှာ ၁ ပွဲနိုင်၊ ၂ ပွဲရှုံးရလဒ်နဲ့ အမှတ်ပေးဇယားရဲ့ အဆင့်(၁၄)နေရာမှာ ရပ်တည်နေပါတယ်။(NVS 008)
