ယူအက်စ်အိုးပင်း ဗိုလ်လုပွဲသို့ တက်ရောက်ခဲ့တဲ့ ဆင်နာ
08 Sep
ကမ္ဘာ့အဆင့်(၁) အီတလီတင်းနစ်သမား ဆင်နာ ဟာ စက်တင်ဘာလ ၆ ရက်က ယှဉ်ပြိုင်ခဲ့တဲ့ ယူအက်စ် အိုးပင်းဆီမီးဖိုင်နယ်မှာ ပြိုင်ဘက်ကိုအနိုင်ယူပြီး ဗိုလ်လုပွဲသို့ တက်ရောက်နိုင်ခဲ့ပါတယ်။ ဆင်နာ ဟာ ဆီမီးဖိုင်နယ် ပွဲအဖြစ် ဗြိတိန်တင်းနစ်သမား ဒါပါ နဲ့ ယှဉ်ပြိုင်ခဲ့ရတာဖြစ်ပြီး ပွဲကစားနေချိန်အတွင်း ဆင်နာ က လက်ကောက်ဝတ် ဒဏ်ရာရခဲ့ပေမယ့် ပွဲပြီးတဲ့အထိ ကစားသွားခဲ့ပါတယ်။ ဗြိတိန်တင်းနစ်သမား ဒါပါ ကလည်း နယူးယော့ခ်ရဲ့ အပူချိန်နဲ့စိုထိုင်းဆအောက်မှာ ပွဲကစားနိုင်ဖို့ကို ရုန်းကန် နေခဲ့ရပြီး ပွဲကစားနေချိန်အတွင်း ၃ ကြိမ်လောက် အန်ခဲ့ရတဲ့အထိ အဆင်မပြေဖြစ်ခဲ့ရပါတယ်။ ဒါပါ အနေနဲ့ ပွဲကို အာရုံစူးစိုက်နိုင်မှုအပိုင်းမှာ အားနည်းခဲ့ရပြီး အမှားအယွင်းတွေများခဲ့တာကြောင့် ဆင်နာ ကို အမှတ်တွေ ပေးခဲ့ရ ပါတယ်။ ပွဲအပြီးမှာ ဆင်နာ က (၇း၅၊ ၇း၆၊ ၆း၂)ဆိုတဲ့ရလဒ်နဲ့ အနိုင်ရခဲ့ပြီး သူ့ရဲ့ကစားသမားဘဝ ဂရင်းစလမ်ပြိုင်ပွဲ ဗိုလ်လုပွဲအဆင့်ကို ဒုတိယအကြိမ်မြောက် တက်ရောက်ခွင့်ရသွားခဲ့တာဖြစ်ပါတယ်။ ဆင်နာ အနေနဲ့ ပထမဆုံးအကြိမ်ယှဉ်ပြိုင်ခဲ့ရတဲ့ ဂရင်းစလမ်ပြိုင်ပွဲ ဗိုလ်လုပွဲမှာ အနိုင်ရပြီး ဩစတြေးလျ အိုးပင်းချန်ပီယံဆုကို ရရှိထားတာဖြစ်ပါတယ်။ ယူအက်စ်အိုးပင်းတင်းနစ် အမျိုးသားတစ်ဦးချင်း ဗိုလ်လုပွဲမှာ ဆင်နာ ဟာ အမေရိကန်နိုင်ငံသား ဖရစ်ခ် နဲ့ ကစားရမှာ ဖြစ်ပါတယ်။(NVS 008)
