“နိုင်ငံလက်ရွေးစင်အသင်းကနေအနားယူရန် အစီအစဉ်မရှိသေးတဲ့ ရော်နယ်ဒို”
04 Sep
အယ်နာဆာအသင်းရဲ့ ပေါ်တူဂီတိုက်စစ်မှူး ရော်နယ်ဒို က လက်ရွေးစင်ကစားသမားဘဝကနေ အနားယူဖို့ အစီအစဉ်မရှိသေးဘူးလို့ စက်တင်ဘာလ ၂ ရက်က ပြောကြားခဲ့ပါတယ်။ ရော်နယ်ဒို ဟာ အသက် ၃၉ နှစ်အရွယ် ရှိပြီဖြစ်ပေမယ့် ဆော်ဒီကလပ် အယ်နာဆာအသင်းမှာ အဓိကကစားသမားအဖြစ် ကစားနေသလို လက်ရွေးစင် ကစားသမားအဖြစ်ကနေလည်း အနားယူဖို့ ဆန္ဒမရှိသေးဘူးလို့ ဆိုထားပါတယ်။ လက်ရွေးစင်ဘဝကနေ အနားယူဖို့က ခက်ခဲတဲ့ ဆုံးဖြတ်ချက် မဟုတ်ပေမယ့် အခုအချိန်မှာတော့ အနားယူဖို့ အစီအစဉ်မရှိသေးဘူးလို့ ရော်နယ်ဒိုက ပြောကြားခဲ့တာ ဖြစ်ပါတယ်။ လက်ရွေးစင်ကစားသမားဘဝမှာ အကောင်းဆုံး ပေးဆပ်ခဲ့ပေမယ့် လူငယ်ကစားသမားတွေကို နေရာပေးဖို့အတွက် လိုအပ်တာကြောင့် အသင်းအတွက် ကစားပေး နိုင်စွမ်း မရှိတော့ဘူးလို့ ခံစားရပြီဆိုတာနဲ့ အနားယူဖို့ဆုံးဖြတ်သွားမယ်လို့ ရော်နယ်ဒို က ဆက်လက်ပြောကြား ခဲ့ပါသေးတယ်။ ရော်နယ်ဒို ဟာ ပေါ်တူဂီလက်ရွေးစင်ကစားသမားဘဝမှာ အသင်းအတွက် ပြိုင်ပွဲစုံ ၂၁၂ ပွဲ ကစားပေးခဲ့ပြီး ဂိုးပေါင်း ၁၃၀ ကို သွင်းယူပေးနိုင်ခဲ့ပါတယ်။ (NVS 008)
