အမေရိကန်နိုင်ငံတွင် မွေးကင်းစကလေးများကို ပုံမှန်ထိုးပေးနေတဲ့ ဗီတာမင် K ထိုးဆေးကို မိဘများက ထိုးနှံလိုမှုမရှိခြင်းကြောင့် အဆိုပါကလေးများတွင် ပြင်းထန်သွေးယိုစိမ့်မှုနှင့် သေဆုံးနိုင်ခြေပါ မြင့်တက်လာ နေကြောင်း သုတေသနအသစ်တစ်ခုက ဖော်ပြထားသည်။ အမေရိကန်ဆေးပညာအသင်းဂျာနယ်(JAMA)မှ ထုတ်ဝေခဲ့သည့် သုတေသနအရ ဗီတာမင် K မထိုးသည့် မွေးကင်းစကလေးအချိုးသည် ၂၀၁၇ ခုနှစ်မှာ ၃ ဒသမ ၁ ရာခိုင်နှုန်းရှိခဲ့ပေမယ့် ၂၀၂၅ ခုနှစ်မှာ ၆ ဒသမ ၈ ရာခိုင်နှုန်းအထိ မြင့်တက်လာသည်။ သုတေသီများက အမေရိကန် ပြည်နယ် ၅၀ စလုံးမှ မွေးကင်းစကလေး ၅၂ သိန်းကို လေ့လာခဲ့ခြင်း ဖြစ်သည်။ ဗီတာမင် K သည် သွေးအတွက်အရေးပါသည့် ဗီတာမင်တစ်မျိုးဖြစ်ပြီး မွေးကင်းစကလေးများတွင် အဆိုပါ ဗီတာမင်ဓာတ် နည်းပါးတတ်တာကြောင့် ဗီတာမင် K မထိုးထားပါက ဦးနှောက်နှင့်အစာခြေလမ်းကြောင်းအတွင်း သွေးယိုစိမ့်မှုတွေ ဖြစ်ပွားနိုင်သည်။ ဗီတာမင် K မထိုးထားသည့် ကလေး ၁၁၄ ဦးထဲမှ တစ်ဦးသည် အသက် ခြောက်လမပြည့်မီ သွေးယိုစိမ့်မှုဖြစ်ပွားနိုင်ကြောင်း တွေ့ရှိရသည်။ မွေးဖွားပြီး ဆေးရုံတက်ရောက်ကုသစဉ် သွေးယိုစိမ့်မှုနှင့်အတူ သေဆုံးနိုင်ခြေသည်လည်း ထိုးဆေးရရှိထားသည့် ကလေးများထက် နှစ်ဆကျော် ပိုများနေ သည်။ အချို့မိဘများသည် ဆေးထိုးခြင်းကြောင့် နာကျင်မှု၊ ဓာတ်မတည့်မှုနှင့် ဘေးထွက်ဆိုးကျိုးများ ဖြစ်နိုင်တယ် ဆိုတဲ့ စိုးရိမ်မှုများကြောင့် ငြင်းပယ်နေကြခြင်းဖြစ်ကြောင်း ST သတင်းဌာနဖော်ပြချက်အရ သိရသည်။