အမေရိကန်သမ္မတ ထရမ့် ၏ အထူးသံတမန် Steve Witkoff နှင့် ထရမ့်၏ သမက်ဖြစ်သူ Kushner တို့သည် အောက်တိုဘာလ ၉ ရက်တွင် အမေရိကန် မိုင်ယာမီမြို့တွင် ယူကရိန်းဆွေးနွေးညှိနှိုင်းမှု ကိုယ်စားလှယ်နှင့် တွေ့ဆုံ မည်ဖြစ်ပြီး ရုရှား-ယူကရိန်း ပဋိပက္ခ အကျပ်အတည်းအခြေအနေအား ထိုးဖောက်ရန်အတွက် အစီအစဉ်အသစ် အဆိုပြုမည်ဖြစ်ကြောင်း အမေရိကန်အစိုးရ အရာရှိများစွာ၏ သတင်းအရင်းအမြစ်ကိုကိုးကား၍ အမေရိကန် Axios သတင်းဝက်ဘ်ဆိုက်က အောက်တိုဘာလ ၈ ရက်တွင် သတင်းဖော်ပြခဲ့သည်။ အစီအစဉ်အသစ်တွင် စွမ်းအင်အခြေခံအဆောက်အဦနှင့် စားနပ်ရိက္ခာပို့ဆောင်ရေးအား တိုက်ခိုက်မှုရပ်တန့် သည့် တစ်စိတ်တစ်ပိုင်း အပစ်ရပ်မှုအဆိုပြုချက်ပါဝင်ကြောင်း၊ ထရမ့်အစိုးရအနေဖြင့် အမေရိကန် ကြားဖြတ် ရွေးကောက်ပွဲ မတိုင်မီနှင့် ယူကရိန်းနိုင်ငံ ဆောင်းရာသီမဝင်မီ သံတမန်နည်းလမ်းဖြင့် ဖြေရှင်းမှုအောင်မြင်ရန် မျှော်လင့်နေကြောင်း၊ ထရမ့်ကိုယ်တိုင်ကလည်း Steve Witkoff နှင့် Kushner တို့ တင်ပြသော နောက်ဆုံး အဆိုပြုချက်ကို နားထောင်ခဲ့ပြီး အကြံပြုချက်ပေးခဲ့ကြောင်း သတင်းတွင်ဖော်ပြထားသည်။ ဆွေးနွေးမှုသည် ၂ ရက်ကြာနိုင်ကြောင်း၊ အမေရိကန်က ဗြိတိန်၊ ပြင်သစ်နှင့် ဂျာမနီမှ အမျိုးသားလုံခြုံရေးရာ အကြံပေးပုဂ္ဂိုလ်နှင့် နေတိုးအဖွဲ့နှင့် ဥရောပသမဂ္ဂမှ အရာရှိများကိုလည်း အစည်းအဝေးတွင် ပါဝင်တက်ရောက်ရန် ဖိတ်ခေါ်ထားကြောင်း၊ ဘက်အသီးသီးက ယူကရိန်းအပေါ် လုံခြုံရေးဆိုင်ရာ အာမခံရေး၊ ယူကရိန်း၏ စစ်ပွဲအလွန် စီးပွားရေး ပြန်လည်နာလန်ထူရေးစသည့် အကြောင်းအရာများအား ဆွေးနွေးသွားမည်ဖြစ်ကြောင်း သတင်း အရင်းအမြစ်ကဆိုသည်။ Steve Witkoff နှင့် Kushner က ယခုလနှောင်းပိုင်းတွင် ရုရှားနိုင်ငံသို့ သွားရောက်၍ ရုရှားသမ္မတ ပူတင်နှင့် တွေ့ဆုံမည်ဖြစ်ကြောင်းလည်း သတင်းကဖော်ပြထားသည်။ ယူကရိန်းသမ္မတ ဇယ်လန်းစကီး ကလည်း အောက်တို ဘာလ ၈ ရက်တွင် ယူကရိန်း-အမေရိကန် အသစ်တစ်ကြိမ် တွေ့ဆုံဆွေးနွေးမှုသတင်းကို မီဒီယာများထံ အတည်ပြု ပြောကြားခဲ့သည်။ (Repost from Xinhua)