ရုရှားသမ္မတ ဗလာဒီမာ ပူတင် နှင့် အီရန်သမ္မတ မာဆော့ ပါဇက်ရှ်ကီရမ် တို့သည် အောက်တိုဘာလ ၈ ရက် ညပိုင်းတွင် တာ့ခ်မင်နစ္စတန်နိုင်ငံ တာ့ခ်မင်ဘာရှီမြို့၌ တွေ့ဆုံခဲ့ပြီး နှစ်နိုင်ငံဆက်ဆံရေးနှင့် အရှေ့အလယ်ပိုင်းဒေသ အခြေအနေတို့ကို ဆွေးနွေးခဲ့ကြကြောင်း ရုရှားမီဒီယာ၏ သတင်းဖော်ပြချက်အရ သိရသည်။ ပဋိပက္ခဖြေရှင်းရေးကို တွန်းအားပေးဆောင်ရွက်ရာတွင် အီရန်နိုင်ငံအား စွမ်းနိုင်သမျှ ကူညီပေးသွားရန် ဆန္ဒရှိကြောင်း ပူတင် က ပြောကြားခဲ့သည်။ လွန်ခဲ့သောနှစ်ဆန်းပိုင်းတွင် နှစ်နိုင်ငံလက်မှတ်ရေးထိုးခဲ့သော နှစ် ၂၀ ကြာ ဘက်စုံမဟာဗျူဟာမြောက် ပူးပေါင်းဆောင်ရွက်ရေးစာချုပ်ကို အခြေခံ၍ နှစ်နိုင်ငံဆက်ဆံရေးသည် အပြုသဘောဖြင့် တိုးတက်လျက်ရှိပြီး ကုန်သွယ်ရေးပမာဏတိုးတက်မှုကို ထိန်းထားကာ ယဉ်ကျေးမှုဖလှယ်ခြင်းများကိုလည်း တက်ကြွစွာလုပ်ဆောင် လျက်ရှိကြောင်း ပူတင် က ပြောကြားခဲ့သည်။ အရှေ့အလယ်ပိုင်းဒေသ အခြေအနေသည် လက်ရှိတွင် အရေးတကြီး ဖြေရှင်းရန်ကိစ္စရပ်ဖြစ်ပြီး အီရန်သည် ဒေသတွင်းပဋိပက္ခကို အဆုံးသတ်ရန် လက်တွေ့ကျကျ ကြိုးပမ်းဆောင်ရွက် လျက်ရှိသည်ကို ရုရှားဘက်က နားလည်ကြောင်း၊ ရုရှားနိုင်ငံသည် အီရန်နိုင်ငံက ပဋိပက္ခဖြေရှင်းရေးကို တွန်းအားပေး ဆောင်ရွက်ရာတွင် စွမ်းနိုင်သမျှ ကြိုးပမ်းကူညီပေးသွားမည်ဖြစ်ကြောင်း ၎င်းက ပြောကြားခဲ့သည်။ ပါဇက်ရှ်ကီရမ် က ပူတင်နှင့် ရုရှားနိုင်ငံ၏ အီရန်နိုင်ငံအပေါ် ထောက်ခံအားပေးမှုကို ကျေးဇူးတင်ကြောင်း ဖော်ပြခဲ့ပြီး အီရန်၏သဘောထားမှာ စစ်ပွဲကို အမြန်ဆုံး အဆုံးသတ်ရန်ဖြစ်သော်လည်း အခွင့်အရေးများကို ကာကွယ် ထိန်းသိမ်းခြင်းမှာ အလွန်အရေးကြီးကြောင်း ထောက်ပြခဲ့သည်။ အကယ်၍ အမေရိကန်သည် တစ်ဖက်သတ်ဝါဒကို အခိုင်အမာ လက်ကိုင်ထားမည်ဆိုပါက စစ်ပွဲသည် အချိန်တိုတိုနှင့် အဆုံးသတ်နိုင်မည်မဟုတ်ကြောင်း ၎င်းက ပြောကြားခဲ့သည်။ အီရန်နှင့် အမေရိကန်တို့သည် ကြားဝင်စေ့စပ်သူများမှတစ်ဆင့် ကြားခံဆွေးနွေးညှိနှိုင်းများကို ဆက်လက် ပြုလုပ်နေဆဲဖြစ်ကြောင်း အီရန်နိုင်ငံခြားရေးဝန်ကြီး အာရက်ဂ်ချီ က အောက်တိုဘာလ ၈ ရက်တွင် ပြောကြားခဲ့ပြီး အီရန်နိုင်ငံဘက်က ‘ခုနစ်ရက်-အစီအစဉ်’ လို့ခေါ်တဲ့ ကိုယ်ပိုင်အဆိုပြုချက်ကို တင်ပြခဲ့ပြီး အမေရိကန်ဘက်က တုံ့ပြန်မှုကိုလည်း နားထောင်ခဲ့ပါတယ်ဟု ပြောကြားခဲ့ကြောင်း အီရန် Tasnim သတင်းဌာန၏ သတင်းဖော်ပြချက်အရ သိရသည်။ (Repost from Xinhua)