“၂၀၂၆ ကမ္ဘာ့အကောင်းဆုံးကစားသမားဆုအတွက် မဲပေးမှုများပိတ်သိမ်းပြီးနောက် လူငယ်ကစားသမားယာမယ် ဆုရရှိရန် ထိပ်ဆုံးမှရေပန်းစားနေ”
30 Sep
ပြင်သစ်မဂ္ဂဇင်းနှင့် ကမ္ဘာ့ဘောလုံးအဖွဲ့ချုပ်တို့ ပူးပေါင်းချီးမြှင့်ပေးအပ်မည့် ၂၀၂၆ ကမ္ဘာ့အကောင်းဆုံး ကစားသမားဆု(Ballon d'Or)အတွက် မဲပေးမှုများကို စက်တင်ဘာလ ၂၈ ရက်က တရားဝင်ပိတ်သိမ်းပြီးနောက် စပိန်အသင်းနှင့် ဘာစီလိုနာအသင်းမှ လူငယ်ကစားသမား ယာမယ် က ဆုရရှိရန် ထိပ်ဆုံးမှရေပန်းစားလျက်ရှိကြောင်း သိရပါတယ်။ ၂၀၂၆ ကမ္ဘာ့အကောင်းဆုံး ကစားသမားဆုအတွက် ပရိသတ်များထံမှ မဲပေးမှုများကို စက်တင်ဘာလ ၈ ရက်က ဆန်ခါတင်ကစားသမားစာရင်း ထုတ်ပြန်ပြီးနောက် မဲပေးမှုစတင်ခဲ့ခြင်းဖြစ်ပြီး ရက် ၂၀ အကြာတွင် မဲပေးမှုကို တရားဝင်ပိတ်သိမ်းခဲ့ပါတယ်။ ကမ္ဘာ့ဘောလုံးအဖွဲ့ချုပ်(ဖီဖာ)က ၂၀၂၆ ကမ္ဘာ့အကောင်းဆုံး ကစားသမားဆုအတွက် ဆန်ခါတင်ကစားသမား ဦးရေ ၃၀ စာရင်းကို ကြေညာပြီးနောက် မဲပေးမှုစတင်ပြီး ဆန္ဒမဲကောက်ယူမှုများ လုပ်ဆောင်ခဲ့ပါတယ်။ လက်ရှိတွင် ယာမယ် က ရမှတ် ၈၄၂ မှတ်ဖြင့် ထိပ်ဆုံးမှရေပန်းစားနေကာ ၎င်း၏နောက်တွင် အင်္ဂလန် အသင်းနှင့် ဘိုင်ယန်မြူးနစ်အသင်း ဝါရင့်တိုက်စစ်ကစားသမား ဟယ်ရီကိန်း က ၇၃၈ မှတ်ဖြင့် ရပ်တည်နေကြောင်း သတင်းများထွက်ပေါ်နေပါတယ်။ ယာမယ်သည် ပြီးခဲ့တဲ့ဘောလုံးရာသီက ဘာစီလိုနာအသင်းနှင့်အတူ အကောင်းဆုံးခြေစွမ်းပြနိုင်ခဲ့ပြီး ပြီးခဲ့တဲ့ ၂၀၂၆ ကမ္ဘာ့ဖလားပြိုင်ပွဲတွင်လည်း စပိန်အသင်းနှင့်အတူ ချန်ပီယံဆုဖလား ဆွတ်ခူးနိုင်ခဲ့ရာ ကမ္ဘာ့အကောင်းဆုံး ကစားသမားဆုအတွက်လည်း ဟယ်ရီကိန်း ကိုကျော်ဖြတ်ပြီး ထိပ်ဆုံးမှရေပန်းစားနေခြင်းဖြစ်ပါတယ်။ ၂၀၂၆ ကမ္ဘာ့အကောင်းဆုံးကစားသမားဆု ပေးအပ်ပွဲအခမ်းအနားကို အောက်တိုဘာလ ၂၆ ရက်တွင် အင်္ဂလန် နိုင်ငံ လန်ဒန်မြို့၌ ကျင်းပမည်ဖြစ်ကြောင်း သိရပါတယ်။(NVS 008)
