ပြင်သစ်အစိုးရသည် စက်သုံးဆီစျေးနှုန်းများ အလျင်အမြန်မြင့်တက်လာမှုနှင့်ပတ်သက်၍ အိမ်ထောင်စု များနှင့် အဓိကကဏ္ဍများကို အကူအညီပေးနိုင်ရန် ယူရိုသန်း ၄၅၀(အမေရိကန်ဒေါ်လာ ၅၁၃ သန်း)ခန့် ကုန်ကျမည်ဟု ခန့်မှန်းရသော အကူအညီပေးရေးအစီအစဉ်သစ်တစ်ခုကို စက်တင်ဘာလ ၂၂ ရက်တွင် ထုတ်ပြန်ကြေညာခဲ့သည်။ ပြင်သစ်အစိုးရ ပြောရေးဆိုခွင့်ရှိသူ Maud Bregeon က ခရီးဝေးမောင်းနှင်သွားလာသူများအတွက် ပေးအပ်သည့် အထောက်အပံ့ကို ဝင်ငွေမြင့်မားသူများအထိ တိုးချဲ့ပေးအပ်မည်ဖြစ်ပြီး အထောက်အပံ့ရရှိနိုင်သူ အရေအတွက်မှာ လူဦးရေ ၃ သန်းမှ ၅ ဒသမ ၅ သန်းအထိ တိုးလာမည်ဟု သတင်းစာရှင်းလင်းပွဲတွင် ပြောကြား ခဲ့သည်။ ပြင်သစ်နိုင်ငံ အသေးစားနှင့်အလတ်စားလုပ်ငန်းများဝန်ကြီး Serge Papin က အလုပ်ရှင်များအနေဖြင့် ၎င်းတို့၏ဝန်ထမ်းများကို ထောက်ပံ့နိုင်သည့် စက်သုံးဆီစရိတ်ထောက်ပံ့ကြေးအတွက် အခွန်ကင်းလွတ်ခွင့်အများဆုံး ပမာဏကို ယူရို ၆၀၀(၆၈၄ ဒေါ်လာ)မှ ၁,၀၀၀ (၁,၁၄၀ ဒေါ်လာ)အထိ တိုးမြှင့်မည်ဟုလည်း ပြောကြားခဲ့သည်။ ထို့အပြင် ဆောက်လုပ်ရေး၊ အများပြည်သူလုပ်ငန်းများနှင့် စိုက်ပျိုးရေးကဏ္ဍအတွက် အကူအညီများကိုလည်း ယခုနှစ်ကုန်အထိ တိုးမြှင့်ပေးသွားမည်ဟု ၎င်းကကြေညာခဲ့သည်။ ပြင်သစ်နိုင်ငံကျန်းမာရေးဝန်ကြီး Stephanie Rist က တစ်နေ့လျှင် ကီလိုမီတာ ၁၀၀ ကျော် သွားလာရသော သူနာပြုများအတွက် ယူရို ၈၀(အမေရိကန်ဒေါ်လာ ၉၁ ဒသမ ၂) တန်ဖိုးရှိ ကျေးလက်ဒေသထောက်ပံ့ကြေး ဖန်တီးပေးမည်ဟု ကြေညာခဲ့သည်။ အရှေ့အလယ်ပိုင်းဒေသပဋိပက္ခများနှင့် ဟော်မုဇ်ရေလက်ကြား ရေကြောင်းသွားလာရေး ပြတ်တောက်မှု များကြောင့် စျေးကွက်အပေါ် ဖိအားပိုမိုသက်ရောက်လာပြီး စက်သုံးဆီစျေးနှုန်းများ ဆက်တိုက်မြင့်တက်နေချိန်တွင် အစိုးရက ယခုကဲ့သို့ အရေးယူဆောင်ရွက်ချက်များ ထုတ်ပြန်ခဲ့ခြင်းဖြစ်သည်။ France Info ၏ ဖော်ပြချက်အရ စက်တင်ဘာလ ၂၂ ရက်တွင် ဒီဇယ်ဆီ၏ ပျမ်းမျှဈေးနှုန်းသည် တစ်လီတာ လျှင် ၂ ဒသမ ၃၉ ယူရို(အမေရိကန်ဒေါ်လာ ၂ ဒသမ ၇၂) သို့ ရောက်ရှိခဲ့သည်။ ယင်းမတိုင်မီ သီတင်းပတ်ကုန် ရက်များက တစ်လီတာလျှင် ၂ ဒသမ ၄၀ ယူရို(ဒေါ်လာ ၂ ဒသမ ၇၄) ကျော်အထိ မြင့်တက်ခဲ့သည်။ ပြင်သစ်နိုင်ငံတွင် အများဆုံးရောင်းချရသော ဓာတ်ဆီအမျိုးအစားဖြစ်သည့် SP95-E10 ၏ ပျမ်းမျှဈေးနှုန်းမှာ တစ်လီတာလျှင် ၂ ဒသမ ၁၅ ယူရို(အမေရိကန်ဒေါ်လာ ၂ ဒသမ ၄၅) ရှိခဲ့ကြောင်းသိရသည်။ အီရန်အပေါ် အစ္စရေးနှင့် အမေရိကန်တို့၏ ပထမဆုံးလေကြောင်းတိုက်ခိုက်မှု မတိုင်မီ ဖေဖော်ဝါရီလ ၂၇ ရက်က စက်သုံးဆီအမျိုးအစားနှစ်ခုလုံး၏ စျေးနှုန်းမှာ ၁ လီတာလျှင် ၁ ဒသမ ၇၂ ယူရို (၁ ဒသမ ၉၆ ဒေါ်လာ) ခန့်သာ ရှိခဲ့ကြောင်း Franceinfo က ဖော်ပြခဲ့သည်။ (Repost from Xinhua Myanmar)