ဆော်ဒီအာရေဗျ၊ တူကီယဲနှင့်ပါကစ္စတန်နိုင်ငံတို့၏ခေါင်းဆောင်များက အရှေ့အလယ်ပိုင်းဒေသတွင် ငြိမ်းချမ်းရေးနှင့်တည်ငြိမ်ရေးကို မြှင့်တင်ရန် ဆန္ဒရှိကြောင်း ပြောကြားခဲ့ကြသည်။ ဒေသတွင်းတင်းမာမှုများ မြင့်တက်နေဆဲဖြစ်သည့်အချိန်တွင် ၎င်းတို့သည် ကာကွယ်ရေးဆိုင်ရာ ပူးတွဲသဘောတူညီချက်တစ်ရပ်ကို လက်မှတ်ရေးထိုးခဲ့ကြသည်။ ဆော်ဒီအာရေဗျနိုင်ငံ၏အိမ်ရှေ့မင်းသား မိုဟာမက် ဘင်ဆာလ်မန်၊ တူကီယဲသမ္မတ အာဒိုဂန်နှင့် ပါကစ္စတန်ဝန်ကြီးချုပ် ရှက်ဘက်ဇ်ရှာရစ်ဖ်တို့က မက္ကာမြို့၌ အဆိုပါသဘောတူညီချက်ကို ဩဂုတ်လ ၇ ရက်တွင် လက်မှတ်ရေးထိုးခဲ့ကြသည်။ ရန်လိုကျူးကျော်မှု မည်သည့်လုပ်ရပ်ကိုမဆို ဆန့်ကျင်တားဆီးနိုင်မည့် စုပေါင်းစွမ်းအားကို ခိုင်မာ စေရန် ရည်ရွယ်ကြောင်းနှင့် ၎င်းတို့အနက် နိုင်ငံတစ်နိုင်ငံအပေါ် တိုက်ခိုက်မှုပြုလုပ်ခြင်း ကို အားလုံး အပေါ်တိုက်ခိုက်မှုအဖြစ် သတ်မှတ်မည်ဖြစ်ကြောင်း ယင်းသဘောတူညီချက်တွင် ပြဋ္ဌာန်းထားသည်။ အဆိုပါသဘောတူညီချက်သည် မည်သည့်နိုင်ငံကိုမျှ ပစ်မှတ်ထားခြင်းမဟုတ်ကြောင်း တူကီယဲ သမ္မတရုံး ပြောရေးဆိုခွင့်ရှိသူတစ်ဦးက လူမှုကွန်ရက်တွင် ရေးသားဖော်ပြခဲ့သည်။ ထို့ပြင် ယင်းသဘောတူညီချက်သည် ကာကွယ်ရေးလုပ်ငန်းကဏ္ဍ ပူးပေါင်းဆောင်ရွက်မှုနှင့်စစ်ရေးဆိုင်ရာပူးတွဲလုပ်ဆောင်နိုင်စွမ်းတို့ကို တိုးတက်စေ မည် ဖြစ်ကြောင်း ၎င်းက ထပ်လောင်း ပြောကြားခဲ့သည်။ အဆိုပါနိုင်ငံသုံးနိုင်ငံစလုံးက ဂါဇာကမ်းမြောင် ဒေသအပေါ် အစ္စရေး၏တိုက်ခိုက်မှုများကို ဝေဖန်ရှုတ်ချကြသည်။ ပါကစ္စတန်နိုင်ငံက အမေရိကန်နှင့်အီရန်တို့ အကြား သံတမန်ရေးရာ ကြိုးပမ်းအားထုတ်မှုများတွင် ပါဝင်ဆောင်ရွက်လျက်ရှိပြီး တူကီယဲနိုင်ငံကလည်း တင်းမာမှုများကို လျှော့ချရေး ကြိုးပမ်းအားထုတ်မှုများတွင် ပါဝင်ဆောင်ရွက်လျက် ရှိကြောင်း NHK သတင်းဌာန ဖော်ပြချက်အရ သိရသည်။