ရန်ကုန်တိုင်းဒေသကြီးအတွင်းရှိ မြို့နယ်များမှာ ကြက်၊ ဝက်၊ သိုး၊ ဆိတ်၊ အမဲသား၊ ငါးနှင့် ကြက်ဥများကို သက်သာသောဈေးနှုန်းများဖြင့် မြို့နယ်များအလိုက် အလှည့်ကျစနစ်ဖြင့် ရောင်းချပေးနိုင်ရေး စီစဉ်ဆောင်ရွက်လျက် ရှိကြောင်း ရန်ကုန်မြို့တော်စည်ပင်သာယာရေးကော်မတီမှ သိရပါတယ်။ ပြည်သူများရဲ့ စားသောက်ကုန်ကျစရိတ်သက်သာပြီး စားသောက်ကုန်ဈေးနှုန်းများ တည်ငြိမ်စေရန်အတွက် ရန်ကုန်တိုင်း‌ဒေသကြီးအစိုးရအဖွဲ့၏ စီစဉ်ညွှန်ကြားမှုဖြင့် ရန်ကုန်မြို့တော်စည်ပင်သာယာရေး‌ကော်မတီမှ သား/ငါး များအား မြို့နယ်များအလိုက် ရောင်းချပေးလျက်ရှိပါတယ်။ အဆိုပါ အသား/ငါးများရောင်းချရာတွင် တစ်ပိဿာအလိုက်ဈေးနှုန်းများမှာ အမဲသား ၂၆၀၀၀ ကျပ်၊ သိုး/ဆိတ် ၆၅,၀၀၀ ကျပ်၊ ဝက် ၂၈,၀၀၀ ကျပ်၊ ကြက် ၁၃,၅၀၀ ကျပ်၊ ကြက်ဥတစ်လုံးလျှင် ၅၅၀ ကျပ်တို့ဖြင့် မြို့နယ်များအလိုက် အလှည့်ကျစနစ်ဖြင့် တာဝန်ခံများဖြင့် ရောင်းချပေးလျက်ရှိကြောင်း သိရပါတယ်။