အမေရိကန်ဗဟိုဘဏ် ဘုတ်အဖွဲ့သည် ဇူလိုင်လ ၂၉ ရက်တွင် နှစ်ရက်ကြာကျင်းပခဲ့သော ငွေကြေးဆိုင်ရာ မူဝါဒအစည်းအဝေးကို အဆုံးသတ်ခဲ့ပြီး အမေရိကန်ဗဟိုဘဏ် ဖက်ဒရယ်ပွင့်လင်းဈေးကွက်ကော်မတီ(FOMC) က ဖက်ဒရယ်ရန်ပုံငွေ အတိုးနှုန်းရည်မှန်းချက်အပိုင်းအခြားကို ၃ ဒသမ ၅ ရာခိုင်နှုန်းမှ ၃ ဒသမ ၇၅ ရာခိုင်နှုန်းကြားတွင် ဆက်လက်ထိန်းသိမ်းထားရန် သဘောတူကြောင်း ကြေညာခဲ့သော်လည်း အမေရိကန်ဗဟိုဘဏ် အတွင်းပိုင်းတွင် သဘောထားကွဲလွဲမှုမှာ သိသာထင်ရှားပေသည်။ ဤဆုံးဖြတ်ချက်သည် စျေးကွက်တွင် ယင်းမတိုင်မီ ပင်မအုပ်စုအမြင်သဘောထား ခန့်မှန်းချက်များနှင့် ကိုက်ညီမှုရှိပြီး အမေရိကန်ဗဟိုဘဏ်အနေဖြင့် ယခုနှစ်အတွင်း ၅ ကြိမ်ဆက်တိုက် အတိုးနှုန်းမပြောင်းလဲဘဲ ဆက်လက်ထိန်းသိမ်းထားခြင်း ဖြစ်သည်။ အရှေ့အလယ်ပိုင်းပဋိပက္ခစသည့် အကြောင်းရင်းများကြောင့် မတည်ငြိမ်မှုများ ပြင်းထန်သော်လည်း စီးပွားရေးလှုပ်ရှားမှုသည် တည်ငြိမ်စွာတိုးချဲ့လျက်ရှိကြောင်း၊ ငွေကြေးဖောင်းပွမှုသည် ၂ ရာခိုင်နှုန်း ရည်မှန်းချက်နှင့် နှိုင်းယှဉ်ပါက မြင့်မားနေဆဲဖြစ်ပြီး အချို့သောအကြောင်းရင်းမှာ ထောက်ပံ့မှုဆိုင်ရာ ရိုက်ခတ်ခံရမှုများက စွမ်းအင် စသည့် လုပ်ငန်းများ၏ဈေးနှုန်းကို မြှင့်တင်ပေးလိုက်ခြင်းကြောင့်ဖြစ်ကြောင်း၊ FOMC သည် ဈေးနှုန်းတည်ငြိမ်မှု အကောင်အထည်ဖော်ရန် အားစိုက်ဆောင်ရွက်လျက်ရှိကြောင်း အမေရိကန်ဗဟိုဘဏ်က ကြေညာချက်တွင် ဖော်ပြထားသည်။ သတိထားဖွယ်ကောင်းသည်မှာ FOMC အဖွဲ့ဝင် ၁၂ ဦးအနက် ၃ ဦးမှာ ထိုနေ့တွင် အတိုးနှုန်းမပြောင်းလဲဘဲ ဆက်လက်ထိန်းသိမ်းထားခြင်း ဆုံးဖြတ်ချက်ကို ကန့်ကွက်မဲပေးခဲ့ပြီး ၎င်းတို့က အတိုးနှုန်းကို ၂၅ အခြေခံပွိုင့်(BPS) တိုးမြှင့်ရန် အဆိုပြုခဲ့ကြသည်။ (Repost from Xinhua Myanmar)