ရန်ကုန်ကလေးဆေးရုံကြီးမှာ ရင်ချင်းဆက်အမြွှာမိန်းကလေးများရဲ့ ခွဲစိတ်ခွဲထုတ်ကုသမှု (Separation Surgery)ကို အောင်မြင်စွာဆောင်ရွက်နိုင်ခဲ့ပြီးနောက် ၁၉ ရက်ပြည့်မြောက်ချိန်မှာ ကလေးနှစ်ဦးစလုံး၏ ကျန်းမာရေး အခြေအနေကောင်းမွန်လျက်ရှိကာ သီးသန့်စီ ပျော်ရွှင်စွာသွားလာလှုပ်ရှားနိုင်နေပြီဖြစ်ကြောင်း ကျန်းမာရေးဝန်ကြီး ဌာနကနေ ထုတ်ပြန်ခဲ့ပါတယ်။ အဆိုပါ ရင်ချင်းဆက်အမြွှာမိန်းကလေးများမှာ ပခုက္ကူမြို့နေ အသက် ၃၁ နှစ်အရွယ် မိခင်မှ ၂၀၂၄ ခုနှစ် ဇန်နဝါရီလ ၈ ရက်မှာ ဗဟိုအမျိုးသမီးဆေးရုံကြီး(မန္တလေး)၌ ခွဲစိတ်မွေးဖွားခဲ့ခြင်းဖြစ်ပြီး၊ မွေးဖွားချိန်မှစတင်၍ ကျန်းမာရေးဝန်ကြီးဌာန၏ လမ်းညွှန်ပံ့ပိုးမှုနဲ့ ဗဟိုအမျိုးသမီးဆေးရုံကြီး(မန္တလေး)၊ ခုတင်(၅၅၀)ဆံ့ ကလေးဆေးရုံ ကြီး(မန္တလေး)နှင့် ကလေးဆေးရုံကြီး(ရန်ကုန်)တို့မှာ အထူးကြပ်မတ်ပြုစုစောင့်ရှောက်မှုများ ဆက်လက်ပေးအပ်ခဲ့တာ ဖြစ်ပါတယ်။ ခွဲစိတ်ကုသရန်အတွက် ၂၀၂၆ ခုနှစ် ဇန်နဝါရီလမှာ ကလေးဆေးရုံကြီး(ရန်ကုန်)သို့ ပြောင်းရွှေ့ကာ လိုအပ်တဲ့ကြိုတင်ပြင်ဆင်မှုများ ဆောင်ရွက်ခဲ့ပြီး၊ ၂၀၂၆ ခုနှစ် ဇွန်လ ၁၁ ရက်တွင် အသက် ၂ နှစ် ၅ လအရွယ်၌ ကလေးဆေးရုံကြီး(ရန်ကုန်)၊ ရန်ကုန်ပြည်သူ့ဆေးရုံကြီး၊ ခုတင်(၅၅၀)ဆံ့ ကလေးဆေးရုံကြီး(မန္တလေး)နှင့် မြောက်ဥက္ကလာပပြည်သူ့ဆေးရုံကြီးတို့မှ ပါမောက္ခများ၊ အထူးကုဆရာဝန်ကြီးများ၊ သူနာပြုများပါဝင်တဲ့ ဆေးဘက် ဆိုင်ရာအဖွဲ့က ခွဲစိတ် ကုသမှုကို အောင်မြင်စွာဆောင်ရွက်နိုင်ခဲ့ခြင်းဖြစ်ကြောင်း သိရပါတယ်။ ကျန်းမာရေးဝန်ကြီးဌာန၏ ထုတ်ပြန်ချက်အရ မြန်မာနိုင်ငံမှာ ယခုခွဲစိတ်ကုသမှုအပါအဝင် ရန်ကုန်ကလေး ဆေးရုံကြီး၌ ရင်ချင်းဆက်အမြွှာခွဲစိတ်ကုသမှု ၉ ကြိမ်နှင့် မန္တလေးကလေးဆေးရုံကြီးမှာ ၃ ကြိမ်၊ စုစုပေါင်း ၁၂ ကြိမ်ကို ပြည်တွင်းဆေးပညာရှင်များရဲ့ စွမ်းဆောင်ရည်ဖြင့် အောင်မြင်စွာဆောင်ရွက်နိုင်ခဲ့ကြောင်း သိရပါတယ်။ (NVS 008)