ရန်ကုန်တိုင်းဒေသကြီးအတွင်းရှိ ငမိုးရိပ်ရေလှောင်တမံမှ ၂၀၂၆ ခုနှစ် နွေစပါးစိုက်ပျိုးရေးအတွက် ရေပေး ဝေမှုလုပ်ငန်းများ ပြီးဆုံးသွားပြီဖြစ်၍ မေလ ၁၅ ရက်မှစတင်ကာ ပြည်သူများအတွက် သောက်သုံးရေကိုသာ ဆက်လက်ပေးဝေလျက်ရှိကြောင်း သက်ဆိုင်ရာတာဝန်ရှိသူများထံမှ သိရပါတယ်။ နွေစပါးစိုက်ပျိုးရေပေးဝေမှု ရပ်နားလိုက်ပြီဖြစ်သော်လည်း လာမည့်မိုးရာသီအတွင်း ရေကြီးရေလျှံမှုအန္တရာယ် လျော့နည်းစေရေးနှင့် အနာဂတ်ရေပေးဝေရာသီများတွင် စိုက်ပျိုးရေနှင့် သောက်သုံးရေ လုံလောက်စွာ ဖြန့်ဝေပေးနိုင် ရေးအတွက် လိုအပ်တဲ့စီမံခန့်ခွဲမှုလုပ်ငန်းများကို ဆက်လက်ဆောင်ရွက်လျက်ရှိပါတယ်။ ယခုနှစ်အတွင်း အယ်လ်နီညို(El Niño)ဖြစ်စဉ်၏ သက်ရောက်မှုများကြောင့် အပူချိန်မြင့်တက်ခြင်းနှင့် မိုးခေါင်ရေရှားမှုများ ကြုံတွေ့ရနိုင်သဖြင့် သက်ဆိုင်ရာဌာနများက အခြေအနေများကို အနီးကပ်စောင့်ကြည့်လျက်ရှိ ကြောင်း သိရပါတယ်။ အယ်လ်နီညိုဖြစ်စဉ်ကြောင့် ရာသီဥတုဖောက်ပြန်မှုများ ဖြစ်ပေါ်နိုင်သည့်အတွက် ၂၀၂၃ ခုနှစ်က ရန်ကုန်တိုင်း ဒေသကြီးတွင် စံချိန်တင်မိုးရေချိန် ၁၂၅ လက်မကျော် ရွာသွန်းခဲ့သည့်ဖြစ်စဉ်ကဲ့သို့ ရာသီဥတုဆိုင်ရာ ထူးခြား ပြောင်းလဲမှုများကို သတိထားစောင့်ကြည့်ရန် လိုအပ်ကြောင်းလည်း တာဝန်ရှိသူများက ထောက်ပြထားကြောင်း သိရပါတယ်။ လက်ရှိရက်ပိုင်းအတွင်း မိုးရွာသွန်းမှုများပြားနိုင်ကြောင်း မိုးလေဝသခန့်မှန်းချက်များ ထွက်ပေါ်နေ သော်လည်း ငမိုးရိပ်ရေလှောင်တမံ၏ ကြံ့ခိုင်မှုနှင့်ပတ်သက်၍ ပြည်သူများအနေဖြင့် စိုးရိမ်ပူပန်ရန် မလိုအပ်ကြောင်း အသိပေးထားပါတယ်။ လက်ရှိအချိန်တွင် တမံအတွင်း ရေလက်ကျန်ပမာဏ နည်းပါးနေသဖြင့် မိုးသည်းထန်စွာ ရွာသွန်းမှုများ ဖြစ်ပေါ်လာခဲ့သော်လည်း ရေထိန်းသိမ်းနိုင်စွမ်း လုံလောက်မှုရှိကြောင်းနှင့် တမံလုံခြုံရေးဆိုင်ရာ စောင့်ကြည့်စစ်ဆေး မှုများကိုလည်း ပုံမှန်ဆောင်ရွက်လျက်ရှိကြောင်း သိရပါတယ်။ (NVS-004)