ပြည်ပရန်စွယ်များကို တုံ့ပြန်နိုင်စေရေးအတွက် ရုရှားတပ်မတော်က အသင့်ပြင်ဆင်သည့်အနေဖြင့် သုံးရက်ကြာမြင့်မည့် မဟာဗျူဟာမြောက်နျူကလီးယားစစ်ရေးလေ့ကျင့်ခန်းကို မေလ ၁၉ ရက်တွင်စတင်ကြောင်း ရုရှားကာကွယ်ရေးဝန်ကြီးဌာနကထုတ်ပြန်သည်။ မေလ ၁၉ ရက်မှ ၂၁ ရက်အထိကြာမြင့်မည့်စစ်ရေးလေ့ကျင့် ခန်း၌စစ်သည် အင်အား ၆၄,၀၀၀ နှင့် စစ်လက်နက်ပစ္စည်းစုစုပေါင်း ၇,၈၀၀ ပါဝင်မည်ဖြစ်သည်။ ထို့ပြင် အမြင့်ပျံ နှင့်အနိမ့်ပျံဒုံးကျည်များပစ်လွှတ်ခြင်းတို့ကိုလည်း စစ်ရေးလေ့ကျင့်မှု၏တစ်စိတ်တစ်ပိုင်းအဖြစ် လုပ်ဆောင်သွား မည်ဖြစ်ကြောင်းနှင့် ယင်းလေ့ကျင့်ခန်းများကိုလီနင်ဂရက်စစ်ဒေသနှင့်အလယ်ပိုင်းတိုင်းစစ်ဒေသတို့၌ လုပ်ဆောင် ခြင်းဖြစ်ကြောင်း ကာကွယ်ရေးဝန်ကြီးဌာန၏ထုတ်ပြန်ချက်တွင် ဖော်ပြထားသည်။ ထိုစစ်လက်နက်ပစ္စည်းများတွင် ဒုံးပစ်လောင်ချာရာပေါင်းများစွာ၊ လေယာဉ်များ၊ သင်္ဘောများနှင့် ရေငုပ် သင်္ဘောများပါဝင်မည်ဖြစ်ကြောင်းနှင့် ရုရှားနိုင်ငံ၏မြောက်ပိုင်းရေယာဉ်စုနှင့်ပစိဖိတ်ရေယာဉ်စုတို့ကလည်း စစ်ရေး လေ့ကျင့်ရာ၌ပါဝင်မည်ဖြစ်ကြောင်း ထုတ်ပြန်ချက်တွင်ဆက်လက် ဖော်ပြထားသည်။ စစ်ရေးလေ့ကျင့်ခန်း၏ အဓိကရည်မှန်းချက်မှာ ပြည်ပ၏တိုက်ခိုက်မှုခံရချိန်တွင် နျူကလီးယားတပ်ဖွဲ့များကို ဖြန့်ကြက်နိုင်ရေး ဖြစ်ကြောင်း The Moscow Times သတင်းဌာနဖော်ပြချက်အရ သိရသည်။