စစ်ကိုင်းတိုင်းဒေသကြီး၊ ကလေးမြို့နှင့် မန္တလေးတိုင်းဒေသကြီး၊ ပြည်ကြီးတံခွန်မြို့နယ်တို့တွင် ခန့်မှန်း ငွေကျပ် ၉ ဘီလီယံကျော်တန်ဖိုးရှိ ဘိန်းဖြူ ၇၇ ကီလိုနှင့် စိတ်ကြွဆေးပြား ၄ သန်းကို ကွင်းဆက်တရားခံများနှင့်အတူ ဖော်ထုတ်ဖမ်းဆီးရမိခဲ့ကြောင်း သတင်းထုတ်ပြန်ချက်များအရ သိရပါတယ်။ ပြီးခဲ့တဲ့ ဧပြီလ ၁၂ ရက်နံနက်ပိုင်းက ကလေးမြို့အဝင်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က NISSAN CONDOR ကားနှင့် GOLDEN TRUCK ကားတို့ပေါ်မှ ဘိန်းဖြူ ၄၈ ဒသမ ၄ ကီလိုကို သက်ပိုင်စိုး၊ ဇော်ထိုက်၊ မျိုးရဲနိုင်၊ ကျော်လင်း တို့နှင့်အတူ စတင်ဖမ်းဆီးရမိခဲ့ခြင်းဖြစ်ပါတယ်။ စစ်ဆေးဖော်ထုတ်ချက်များအရ ကလေးမြို့၊ စက်မှုဇုန်သွားလမ်း၌ နိုင်လင်းဇော်နှင့် နေလင်းဦး(ခ)ဆေးဆရာ တို့ မောင်းနှင်လာသည့်ကားပေါ်မှ ဘိန်းဖြူ ၂၈ ဒသမ ၆ ကီလို၊ ကလေးမြို့၌ လက်ခံရယူမည့်သူ ညွန့်တင်နှင့် လားရှိုးမြို့မှ သယ်ဆောင်ခိုင်းသူ နိုင်ဝင်း(ခ)ရုပ်ဆိုး၊ မူးယစ်ဆေးဝါးသယ်ဆောင်ရာတွင် ပူးပေါင်းပါဝင်သူ ဘဂျမ်း တို့ကို ဧပြီလ ၃၀ ရက်တွင် ထပ်မံဖမ်းဆီးရမိခဲ့ပြီး စစ်ဆေးချက်အရ ပြည်ကြီးတံခွန်မြို့နယ်၌ ရပ်တန့်ထားသော ၆ ဘီးကား ပေါ်မှ စိတ်ကြွဆေးပြား ၄ သန်းကို ထပ်မံသိမ်းဆည်းရမိခဲ့ပါတယ်။ အဆိုပါဖမ်းဆီးရမိမှုဖြစ်စဉ်အတွင်း ခန့်မှန်းငွေကျပ် ၉ ဒသမ ၈၅ ဘီလီယံတန်ဖိုးရှိ ဘိန်းဖြူ ၇၇ ကီလိုနှင့် စိတ်ကြွဆေးပြားလေးသန်းတို့အပြင် ဖမ်းဆီးရမိသူများအား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ ဆိုင်ရာဥပဒေအရ အရေးယူထားပြီး ၎င်းတို့၏ မူးယစ်ဆေးဝါးသယ်ဆောင်ရာမှရရှိသည့် ငွေကြေးအကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေးအတွက် ငွေကြေးခဝါချမှုတိုက်ဖျက်ရေးဥပဒေဖြင့်လည်း ဆက်လက်အရေးယူ‌ဆောင်ရွက်လျက်ရှိကာ ဆက်စပ်တရားခံများကိုလည်း ဖော်ထုတ်ဖမ်းဆီးနိုင်ရေး ဆောင်ရွက်လျက် ရှိကြောင်း သိရပါတယ်။(NVS 004)