နိုင်ငံတော်သမ္မတ၏ မိန့်ခွန်းလမ်းညွှန်ချက်များကို အကောင်အထည်ဖော်ဆောင်ရွက်နိုင်ရေးအတွက် လုပ်ငန်းဌာနအလိုက် ဆောင်ရွက်မည့်အစီအစဉ်များ ရှင်းလင်းခြင်းအခမ်းအနားကို ဧပြီလ ၂၁ ရက်၊ မွန်းလွဲ ၂ နာရီတွင် မြန်မာနိုင်ငံတော်ဗဟိုဘဏ်၊ နေပြည်တော် ဇမ္ဗူသီရိခန်းမမှာ ကျင်းပပြုလုပ်ခဲ့ပါတယ်။ အဆိုပါအခမ်းအနားသို့ မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါက်တာခင်နိုင်ဦးနှင့် ဒုတိယဥက္ကဋ္ဌများ ဖြစ်ကြသော ဦးဇော်မြင့်နိုင်၊ ဦးသက်ထွန်းအောင်၊ ဒေါက်တာစန္ဒာဦးတို့နှင့်အတူ နေပြည်တော်၊ ရန်ကုန်နှင့် မန္တလေးမြို့ များမှ အရာထမ်း၊ အမှုထမ်းများ တက်ရောက်ခဲ့ကြပါတယ်။ မြန်မာနိုင်ငံတော်ဗဟိုဘဏ်ဥက္ကဋ္ဌက နိုင်ငံတော်သမ္မတ၏ ဦးဆောင်မှုဖြင့် မြန်မာနိုင်ငံသည် ဒီမိုကရေစီ လမ်းကြောင်းပေါ်သို့ ပြန်လည်လျှောက်လှမ်းနေပြီး စီးပွားရေးဖွံ့ဖြိုးတိုးတက်ရေးအတွက် ဈေးကွက်စီးပွားရေးစနစ်ကို အကောင်အထည်ဖော် ဆောင်ရွက်သွားမည်ဖြစ်ကြောင်း ပြောကြားခဲ့ပါတယ်။ ဒါ့အပြင် နိုင်ငံ့စီးပွားရေး တိုးတက်စေရန် အသေးစား၊ အငယ်စားနှင့် အလတ်စားစီးပွားရေးလုပ်ငန်း (MSMEs)များ ဖွံ့ဖြိုးတိုးတက်ရေးကို အလေးထားကာ ချေးငွေထောက်ပံ့မှုများကို မြန်မာ့စီးပွားရေးဘဏ်နှင့် ပုဂ္ဂလိက ဘဏ်များမှတစ်ဆင့် ဆက်လက်ပေးအပ်လျက်ရှိပါတယ်။ ငွေကြေးတည်ငြိမ်ရေး၊ ဘဏ်လုပ်ငန်းကဏ္ဍတည်ငြိမ်ရေး နှင့် ကျပ်ငွေတန်ဖိုးတည်ငြိမ်ရေးတို့ကို အဓိကထားဆောင်ရွက်လျက်ရှိပြီး ငွေကြေးဖောင်းပွမှုနှုန်းကို လျှော့ချနိုင်ရန် သင့်လျော်သော ငွေကြေးမူဝါဒများကို ကျင့်သုံးသွားမည်ဖြစ်ကြောင်း သိရပါတယ်။ နိုင်ငံခြားငွေလဲလှယ်နှုန်းတည်ငြိမ်ရေးအတွက် နိုင်ငံခြားမှလုပ်သားငွေလွှဲဝင်ငွေများကို တရားဝင်ဘဏ် လမ်းကြောင်းမှ ဝင်ရောက်လာစေရေးအားပေးခြင်းနှင့် လိုအပ်တဲ့အချိန်မှာ ဗဟိုဘဏ်မှ ဈေးကွက်သို့ နိုင်ငံခြားငွေ ရောင်းချပေးခြင်းများကို ဆက်လက်ဆောင်ရွက်သွားမည်ဖြစ်ကြောင်း ထုတ်ဖော်ပြောကြားခဲ့ပါတယ်။ အဲဒီနောက် နိုင်ငံတကာငွေရေးကြေးရေးအဖွဲ့အစည်းများဖြစ်တဲ့ အာဆီယံ၊ SEACEN နှင့် ACU အစည်းအဝေးများမှာ ဆက်လက်ပါဝင်ပူးပေါင်းဆောင်ရွက်သွားမည်ဖြစ်ကြောင်း သိရပါတယ်။ အဆိုပါ ရှင်းလင်းပွဲဟာ နိုင်ငံတော်သမ္မတ၏ လမ်းညွှန်ချက်များကို လက်တွေ့အကောင်အထည်ဖော်နိုင်ရန် ဌာနအလိုက် ပူးပေါင်း ဆောင်ရွက်ရေးကို အားဖြည့်ပေးမည့် အရေးပါသော အစီအစဉ်တစ်ရပ်ဖြစ်ကြောင်း သိရပါတယ်။ (NVS 004)