ပို့ဆောင်ရေးနှင့်ဆက်သွယ်ရေးဝန်ကြီးဌာန၏ မြန်မာ့မီးရထားမှ မဟာသင်္ကြန်နှစ်သစ်ကူး ရုံးပိတ်ရက် ကာလ အတွင်း ခရီးသွားပြည်သူများနှင့် ဌာနဆိုင်ရာဝန်ထမ်းများ အဆင်ပြေချောမွေ့စွာ သွားလာနိုင်ရေးအတွက် ပုံမှန် ပြေးဆွဲလျက်ရှိတဲ့ ရထားများအပြင် အထူးရထားများကို ထပ်မံတိုးချဲ့ ပြေးဆွဲပေးသွားမည်ဖြစ်ကြောင်း သိရပါတယ်။ အဆိုပါ အထူးရထားများကို ရန်ကုန်–နေပြည်တော်၊ ရန်ကုန်–ပြည်နှင့် ရန်ကုန်–မော်လမြိုင် ခရီးစဉ်များတွင် ဧပြီလ ၁၀ ရက်မှ ၂၀ ရက်အတွင်း သတ်မှတ်ထားသော ရက်များအလိုက် ပြေးဆွဲပေးသွားမည်ဖြစ်ပြီး DEMU (စပိန်) ရထားများနှင့် လေအိတ်ရထားများ ပါဝင်မှာဖြစ်ပါတယ်။ ဒါ့အအပြင် ရန်ကုန်–ပြည်နှင့် ရန်ကုန်–မော်လမြိုင်လမ်းပိုင်းများမှာ အထက်တန်းလက်မှတ်များကို ၃ ရက် ကြိုတင်၍လည်းကောင်း၊ ရိုးရိုးတန်းလက်မှတ်များကို ၁ ရက်ကြိုတင်၍လည်းကောင်း သက်ဆိုင်ရာဘူတာများမှာ ဝယ်ယူနိုင်မည်ဖြစ်ပြီး ရန်ကုန်–နေပြည်တော်လမ်းပိုင်းအတွက် Online Railway Ticketing and Payment System (ORTP) စနစ်ဖြင့်လည်း ကြိုတင်ဝယ်ယူနိုင်မည်ဖြစ်ကြောင်း သိရပါတယ်။ သို့သော် သင်္ကြန်အကြိုနေ့ဖြစ်တဲ့ ဧပြီလ ၁၃ ရက်မှ သင်္ကြန်အတက်နေ့ဖြစ်သည့် ဧပြီလ ၁၆ ရက်အထိ အချို့သော လူစီးအမြန်ရထားများနှင့် ရန်ကုန်မြို့ပတ်ရထားများကို ခေတ္တရပ်နားထားမည်ဖြစ်ကြောင်း သိရပါတယ်။ မြန်မာ့မီးရထားက အထူးရထားများ ထပ်မံပြေးဆွဲပေးခြင်းက သင်္ကြန်ကာလအတွင်း ခရီးသွားပြည်သူများ၏ သွားလာရေး လိုအပ်ချက်များကို ဖြည့်ဆည်းနိုင်ရန် ရည်ရွယ်ထားခြင်းဖြစ်ကြောင်း သိရပါတယ်။(NVS 004)