ထူးချွန်သည့် မြန်မာကျောင်းသားများအတွက် Fulbright ပညာသင်ဆု ပေးအပ်မည်ဟု ရန်ကုန်မြို့ရှိ အမေရိကန်သံရုံးက မတ်လ ၁၈ ရက်တွင် ထုတ်ပြန်ကြေညာခဲ့ပါတယ်။ Fulbright Foreign Student Program ဟာ အမေရိကန်ပြည်ထောင်စုရှိ တက္ကသိုလ်တစ်ခုတွင် မဟာဘွဲ့တက်လိုသော မြန်မာနိုင်ငံမှ ကျောင်းသားများအား ပညာသင်ဆုအပြည့်အစုံထောက်ပံ့ပေးခြင်းဟု သံရုံးကဆိုပါတယ်။ အဆိုပါပညာသင်ဆုမှာ ၂၀၂၇- ၂၀၂၈ ပညာသင် နှစ်အတွက်ဖြစ်ပြီး မေလ ၁ ရက် နောက်ဆုံးထားလျှောက်ထားနိုင်ကြောင်း သိရပါတယ်။ လျှောက်ထားသူများအနေနဲ့ လက်ရှိကန့်သတ်ချက်များနှင့်လျှောက်ထားရာတွင် သက်ဆိုင်ရာခရီးသွား ခြွင်းချက်အတွက် အရည်အချင်းပြည့်မီခြင်းလိုအပ်ချက်ကို ထည့်သွင်းစဉ်းစားသင့်သည်ဟု သံရုံးက အသိပေးထား ပါတယ်။ အမေရိကန်အစိုးရက မြန်မာနိုင်ငံကို ခရီးသွားလာခွင့်ပိတ်ပြီးသည့်နောက်ပိုင်းတွင် Fulbright ပညာတော် သင်ဆုမှာရပ်တန့်သွားခဲ့ပြီး ယခုပြန်လည်ခေါ်ယူခြင်းဖြစ်ပါတယ်။ အမေရိကန်သမ္မတ ဒေါ်နယ်ထရန့်က ၂၀၂၅ ခုနှစ်၊ ဇွန်လ ၄ ရက်တွင် မြန်မာအပါအဝင်နိုင်ငံပေါင်း ၁၂ နိုင်ငံကို ပြည်ဝင်ခွင့်ပိတ်ပင်သည့်အမိန့်ကို အမိန့် ထုတ်ခဲ့ပြီး ယင်းအမိန့်မှာ ဇွန်လ ၉ ရက်တွင် စတင်အသက်ဝင်ခဲ့ကြောင်း သိရပါတယ်။ (NVS 004)