စက်သုံးဆီမပြတ်လပ်စေရန်နှင့် စက်သုံးဆီအမှန်တကယ်လိုအပ်သူများ အဆင်ပြေချောမွေ့စွာ ဝယ်ယူရရှိ နိုင်စေရန်ရည်ရွယ်၍ အရောင်းဆိုင်များမှာ တစ်ရက်အတွင်း ၂ ကြိမ် (သို့မဟုတ်) ၃ ကြိမ်တန်းစီ ဝယ်ယူမှုများ လျော့နည်းပပျောက်စေရေးအတွက် အရောင်းဆိုင်များအနေနဲ့ တယ်လီဖုန်း Application ကို အသုံးပြုပြီး စိစစ် ရောင်းချမှုများ ဆောင်ရွက်သွားမည်ဖြစ်ပါတယ်။ အခုလိုဆောင်ရွက်ရာမှာ အများပြည်သူဝန်ထုပ်ဝန်ပိုးမဖြစ်စေရေးနှင့် ပိုမိုရိုးရှင်းလွယ်ကူစွာဆောင်ရွက် နိုင်ရေးအတွက် ယာဉ်ပိုင်ရှင်များမှ Application အသုံးပြုရန်နှင့် Registration ပြုလုပ်ရန် လုံးဝမလိုအပ်ဘဲ အရောင်းဆိုင်အခြေပြုစိစစ်သည့်နည်းလမ်းဖြင့် ဆောင်ရွက်သွားမှာဖြစ်ပါတယ်။ မော်တော်ယာဉ်များအတွက် Wheel Tax ၏ Barcode ကိုလည်းကောင်း၊ မော်တော်ဆိုင်ကယ်များအတွက် Wheel Tax ပါအချက်အလက်များကို အသုံးပြုပြီး QR Code ထုတ်ပေး၍လည်းကောင်း Application ဖြင့် အလိုအလျောက်စစ်ဆေးသည့်နည်းလမ်းဖြင့် စိစစ်ရောင်းချပေးသွားမည်ဖြစ်ပါတယ်။ မော်တော်ယာဉ်များအတွက် Wheel Tax တွင်ပါရှိသော Barcode ကို ဆိုင်ဝန်ထမ်းမှ Scan ဖတ်၍ စနစ်မှ အလိုအလျောက်စစ်ဆေးပြီး တစ်ရက်အတွင်းတစ်ကြိမ်မျှ စက်သုံးဆီဝယ်ယူထားခြင်းမရှိသေးပါက စက်သုံးဆီများ ဆက်လက်ရောင်းချပေးမှာဖြစ်ပါတယ်။ အကယ်၍ တစ်ရက်အတွင်း နောက်တစ်ကြိမ် ထပ်မံဝယ်ယူရန် မည်သည့် ဆိုင်မှာမဆို Scan ဖတ်ပါက ၎င်းရက်အတွင်း ပထမအကြိမ်ဝယ်ယူခဲ့မှုကို ဖော်ပြပေးမည်ဖြစ်ကာ ဆီဝယ်ယူခွင့် ရရှိမည်မဟုတ်ဘဲ နောက်တစ်ရက်မှသာ ထပ်မံဝယ်ယူခွင့်ရရှိမှာဖြစ်ပါတယ်။ တစ်ရက်အတွင်း တစ်ကြိမ်ဝယ်ယူ ပြီးနောက် ထပ်မံတန်းစီဝယ်ယူမှုများမရှိစေရေး စိစစ်တားမြစ်သွားမည်ဖြစ်ပါတယ်။ မော်တော်ဆိုင်ကယ်များ၏ Wheel Tax တွင် Barcode မပါရှိသည့်အတွက် အရောင်းဆိုင်တွင် QR Code များထုတ်ယူရမှာဖြစ်ပါတယ်။ အခုလိုထုတ်ယူနိုင်ရေးအတွက် ယာဉ်ပိုင်ရှင်များအနေနဲ့ ဆိုင်ကယ်၏ Wheel Tax ကို အရောင်းဆိုင်ဝန်ထမ်းသို့ပေးအပ်ပြီး ဝန်ထမ်းမှ Application မှာ ယာဉ်နံပါတ်နှင့် သက်တမ်းကုန်ဆုံးရက်များ ဖြည့်သွင်းကာ QR Code ထုတ်ပေးမှာဖြစ်ပါတယ်။ ယင်း QR Code ကို ပိုင်ရှင်အနေနဲ့ ဖုန်းဖြင့်ဓာတ်ပုံရိုက်ယူခြင်း သို့မဟုတ် အရောင်းဆိုင်မှ Print ထုတ်ပေးခြင်းဖြင့် ရယူသိမ်းဆည်းထားရှိရန် လိုအပ်မည်ဖြစ်ပါတယ်။ စက်သုံးဆီဝယ်ယူသည့်အခါတိုင်း ၎င်း QR Code ကို အရောင်းဆိုင်ဝန်ထမ်းသို့ ပြသဝယ်ယူနိုင်မည်ဖြစ်ပြီး မော်တော်ယာဉ်များတွင် စိစစ်သကဲ့သို့ တစ်ရက်အတွင်း ၂ ကြိမ် (သို့မဟုတ်) ၃ ကြိမ် ဝယ်ယူမှုမရှိစေရေးစနစ်မှ အလိုအလျောက် စစ်ဆေးရောင်းချပေးသွားမှာဖြစ်ပါတယ်။ အရောင်းဆိုင်များမှ စက်သုံးဆီများစိစစ်ရောင်းချရာတွင် နိုင်ငံတော်မှ ထုတ်ပြန်ထားရှိတဲ့ မူဝါဒများနှင့်အညီ ယာဉ်အသုံးပြုခွင့် ခွင့်ပြုထားမှုအလိုက် စက်သုံးဆီရောင်းချနိုင်ရေးကိုလည်း တစ်ပါတည်းစစ်ဆေးမည်ဖြစ်ပါသဖြင့် မိမိယာဉ်အသုံးပြုခွင့်ရှိသည့် ရက်များအတွက်သာ စက်သုံးဆီဝယ်ယူခွင့်ရရှိမည် ဖြစ်ပါကြောင်း အသိပေးထားပါတယ်။ နေပြည်တော်ကောင်စီနယ်မြေ၊ ရန်ကုန်မြို့၊ မန္တလေးမြို့နှင့် တောင်ကြီးမြို့တို့မှာ မတ်လ ၁၂ ရက်မှစတင်၍ စက်သုံးဆီအရောင်းဆိုင်များ၌ Application နဲ့ အလိုအလျောက်စစ်ဆေးတဲ့ နည်းလမ်းကို စမ်းသပ်အသုံးပြုသွားမှာ ဖြစ်ပြီး ၎င်းစနစ်ကို လိုအပ်သောစစ်ဆေးပြုပြင်မှုများ ဆောင်ရွက်ပြီးပါက ကျန်မြို့ကြီးများတွင်လည်း ဆက်လက်၍ အသုံးပြုသွားမည်ဖြစ်ပါတယ်။ ပြည်သူများ၏ ပူးပေါင်းပါဝင်ကူညီဆောင်ရွက်ပေးမှုများကြောင့် စက်သုံးဆီအရောင်းဆိုင်များမှာ ယာဉ်တန်းစီမှု များလျော့ကျသွားပြီး ပုံမှန်ဖြန့်ဖြူးရောင်းချနိုင်သည့်အခြေအနေသို့ ပြန်လည်ရောက်ရှိခဲ့ပါတယ်။ စွမ်းအင်ဝန်ကြီးဌာနအနေနဲ့လည်း နေပြည်တော်ရှိ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၏ Online Monitoring Center တွင် စက်သုံးဆီတင်သွင်း၊ သိုလှောင်၊ ဖြန့်ဖြူးရောင်းချခြင်းလုပ်ငန်းစဉ် (Supply Chain) တစ်လျှောက်ကို အချိန်နှင့်တပြေးညီ စောင့်ကြည့်ကြပ်မတ်လျက်ရှိခြင်း၊ စက်သုံးဆီရောင်းချမှုများနှင့်ပတ်သက်၍ မြို့ကြီးများရှိ စက်သုံးဆီအရောင်းဆိုင်များတွင် ရောင်းချပေးတဲ့ ယာဉ်အမျိုးအစားနှင့် ယာဉ်နံပါတ်၊ ဆီအမျိုးအစား နှင့် ပမာဏ၊ ရောင်းချပေးတဲ့ဈေးနှုန်း စသည်တို့ကိုလည်း အချိန်နှင့်တပြေးညီ စောင့်ကြည့်ကြပ်မတ်လျက်ရှိခြင်းတို့အပြင် ပြည်တွင်းစက်သုံးဆီဖူလုံမှုရှိစေရေးကို အစီအမံအတိုင်း အထူးအလေးထားဆောင်ရွက်လျက်ရှိကြောင်း အသိပေး ထုတ်ပြန်ထားပါတယ်။ (NVS 004)