ပြင်သစ်နိုင်ငံသမ္မတ မက်ခရွန် သည် မတ်လ ၈ ရက်တွင် အီရန်နိုင်ငံသမ္မတ မာဆော့ ပါဇက်ရှ်ကီရမ် နှင့် ဖုန်းဖြင့် ဆက်သွယ်ဆွေးနွေးခဲ့ရာတွင် အီရန်အနေဖြင့် ဟော်မုဇ်ရေလက်ကြား ရေကြောင်းသွားလာမှု လွတ်လပ်ခွင့်ကို အာမခံပေးရန်တိုက်တွန်းကာ ပြင်သစ်ဘက်က အီရန်နျူကလီးယားအရေးနှင့် ပဲ့ထိန်းဒုံးကျည်အစီအစဉ်အပေါ် များစွာဂရုပြုမှုကို ထပ်လောင်းပြောကြားခဲ့သည်။ မက်ခရွန် က လူမှုမီဒီယာတွင် ထုတ်ပြန်သည့်သတင်းအရ အရေးကြီးစိန်ခေါ်မှုများကို ရင်ဆိုင်ရန်၊ အခြေအနေ အဆင့်မြင့်တက်လာမှုအား အဆုံးသတ်၍ ငြိမ်းချမ်းရေးအား ကာကွယ်ထိန်းသိမ်းရန်အလို့ငှာ သံတမန်ရေး နည်းလမ်းဖြင့် ဖြေရှင်းခြင်းသည် ယခင်မည်သည့်အချိန်ကထက်မဆို အရေးတကြီးလိုအပ်နေကြောင်း ၎င်းအနေဖြင့် မာဆော့ ပါဇက်ရှ်ကီရမ် ထံ ပြောကြားခဲ့သည်ဟု သိရသည်။ မက်ခရွန် သည် ထိုနေ့တွင် အီဂျစ်နိုင်ငံသမ္မတ အယ်လ်စီစီ နှင့်လည်း ဖုန်းဖြင့်ဆက်သွယ်ခဲ့သည်။ နှစ်ဖက် အနေဖြင့် ပင်လယ်နီရေကြောင်းပို့ဆောင်ရေး၏ ဘေးကင်းလုံခြုံမှုအား အမြန်ဆုံးအာမခံပေးရန် မဖြစ်မနေ လုပ်ဆောင်ရမည်ဟု တစ်ပြေးညီယူဆကြောင်း ၎င်းက လူမှုမီဒီယာတွင် ပြောကြားခဲ့သည်။ အဆိုပါအရေးကြီးဒေသ၏ ရေကြောင်းသွားလာမှု လွတ်လပ်ခွင့်သည် စီးပွားရေးအစုအဖွဲ့အားလုံးအတွက် အလွန်အရေးကြီးရာ အထူးသဖြင့် စွမ်းအင်အရင်းအမြစ်ပို့ဆောင်မှုနှင့် ပတ်သက်ကြောင်း ၎င်းက ပြောကြားခဲ့သည်။ လတ်တလောကာလတွင် စစ်ပွဲ၏ သက်ရောက်မှုခံရခြင်းကြောင့် အရှေ့အလယ်ပိုင်းဒေသ ရေနံပို့ဆောင် မှုသည် အဆက်မပြတ်တားဆီးပိတ်ဆို့မှုခံရပြီး အီရတ်၊ ကာတာ စသည့် အဓိကရေနံထွက်နိုင်ငံများသည် ထိုမတိုင်မီ ရေနံထုတ်လုပ်မှုလျှော့ချကြောင်း ကြေညာခဲ့သည်။ ဟော်မုဇ်ရေလက်ကြားဟူသည့် တစ်ကမ္ဘာလုံးတွင် အရေးကြီး စွမ်းအင်လမ်းကြောင်းသည် ဆက်လက်ကန့်သတ်ခံနေရပါက လာမည့် စနေ၊ တနင်္ဂနွေအထိ အရှေ့အလယ်ပိုင်းဒေသ ရေနံစိမ်းများ နေ့စဉ်ပျမ်းမျှလျော့နည်းသွားမည့် အထွက်နှုန်းသည် ပီပါ ၄ သန်းကျော်ရှိနိုင်ကြောင်း J.P. Morgan က ခန့်မှန်းထားသည်။ (Repost from Xinhua Myanmar)