ယူကရိန်းစစ်ပွဲနှင့် ဆက်နွှယ်နေသည့် ဒေါ်လာသန်းပေါင်းများစွာတန်ဖိုးရှိ ရွှေချောင်းများနှင့်ငွေကြေးများကို ဟန်ဂေရီနိုင်ငံက သိမ်းဆည်းရမိခဲ့ကြောင်း သိရသည်။ ဟန်ဂေရီအစိုးရသည် ငွေကြေးခဝါချမှုနှင့်စပ်လျဉ်း၍ စုံစမ်းဖော်ထုတ်ခဲ့ရာမှ အမေရိကန်ဒေါ်လာသန်း ၁၀၀ ခန့်တန်ဖိုးရှိ ဒေါ်လာ၊ ယူရိုငွေကြေးများနှင့် ရွှေချောင်းများကို သိမ်းဆည်းရမိခဲ့ပြီး တရားမဝင်ငွေကြေးနှင့် ရွှေချောင်း များကို သယ်ယူပို့ဆောင်ပေးခဲ့သည့် ယူကရိန်းနိုင်ငံသားအချို့ကိုပါ ဖမ်းဆီးနိုင်ခဲ့ခြင်းဖြစ်ကြောင်း ဟန်ဂေရီ နိုင်ငံခြားရေးဝန်ကြီး ပီတာဆီ ဂျာတို က ပြောကြားသည်။ အဆိုပါ ရွှေချောင်းများနှင့်ငွေကြေးများအား ဩစတြီးယားနိုင်ငံရှိ ရိုက်ဖေးဆန် ဘဏ်မှတစ်ဆင့် ယူကရိန်း နိုင်ငံအတွင်းသို့ သယ်ဆောင်လာစဉ် ဟန်ဂေရီအာဏာပိုင်များက ကြားဖြတ်သိမ်းဆည်းနိုင်ခဲ့ခြင်းဖြစ်ကြောင်း ယူကရိန်းနိုင်ငံ၏ ဒုတိယအကြီးဆုံး နိုင်ငံပိုင်ဘဏ်ဖြစ်သည့် အော့ချာဘဏ် က မတ်လ ၆ ရက်တွင် ထုတ်ပြန်ခဲ့သည်။ သိမ်းဆည်းရမိခဲ့သည့် ပစ္စည်းများတွင် ခန့်မှန်းခြေ ၉ ကီလိုရှိ ရွှေချောင်းများ၊ အမေရိကန်ဒေါ်လာနှင့် ယူရိုငွေ စုစုပေါင်း သန်း ၈၀ ခန့်ပါဝင်သည်။ ယခုနှစ်တစ်နှစ်အတွင်းမှာပင် ဟန်ဂေရီ နယ်မြေအတွင်းဖြတ်ကျော်၍ ယူကရိန်းနိုင်ငံအတွင်းသို့ အမေရိကန်ဒေါ်လာ သန်း ၉၀၀ ကျော်၊ ယူရို ၄၂ဝ သန်းနှင့် ရွှေချောင်း ၁၄၆ ကီလိုဂရမ်အထိ တရားမဝင်သယ်ယူ ပို့ဆောင်ခဲ့ကြောင်း ဟန်ဂေရီအမျိုးသား အခွန်နှင့်အကောက်ခွန်ဦးစီးဌာနက မတ်လ ၆ ရက်တွင် ထုတ်ပြန်ထားသည်။