နိုင်ငံခြားငွေကြေးများ တရားမဝင် ဝယ်ယူ/ရောင်းချ/လဲလှယ်ခြင်းများကို ဆောင်ရွက်လျက်ရှိသည့် လူပုဂ္ဂိုလ် များနှင့် အဖွဲ့အစည်းများအား အရေးယူဆောင်ရွက်ထားရှိကြောင်း မြန်မာနိုင်ငံတော်ဗဟိုဘဏ်မှ ဇန်နဝါရီလ ၁၆ ရက် တွင် ထုတ်ပြန်ခဲ့ပါတယ်။ မြန်မာနိုင်ငံတော်ဗဟိုဘဏ်က နိုင်ငံခြားငွေလဲလှယ်နှုန်း တည်ငြိမ်စေရန်နှင့် ဈေးကစားခြင်းများ မဖြစ်ပေါ် စေရန် နိုင်ငံခြားငွေများကို Online Trading Pltaform မှတစ်ဆင့် သွင်းကုန်လုပ်ငန်းရှင်များ၊ ရောင်းချပေးကာ နိုင်ငံခြားသို့ ဆေးကုသခြင်း၊ ပညာတော်သင်သွားခြင်း၊ ဘုရားဖူးသွားခြင်း၊ အလုပ်အကိုင်ကိစ္စရပ်များဖြင့် ထွက်ခွာမည့် သူများအတွက် အသေးသုံးနိုင်ငံခြားငွေများကို ပုဂ္ဂလိကဘဏ်များ၏ ငွေလွှဲ‌ကောင်တာများတွင် ရောင်းချပေးခြင်း များကို ဆောင်ရွက်ပေးလျက်ရှိနေကြောင်း သိရပါတယ်။ ဒါ့အပြင် နိုင်ငံခြားသုံးငွေစီမံခန့်ခွဲမှုဥပဒေနှင့် အဆိုပါဥပဒေအရ ထုတ်ပြန်ထားသော ညွှန်ကြားချက်များကို နိုင်ငံခြား‌ငွေများ လဲလှယ်ရောင်းဝယ်ရေးလုပ်ငန်း ဆောင်ရွက်နေသူများအနေဖြင့် လိုက်နာဆောင်ရွက်စေရန် နိုင်ငံခြားငွေလဲကောင်တာများအား စစ်‌ဆေးလျက်ရှိသည့်အပြင် လိုင်စင်မရှိဘဲ အရောင်းအဝယ်ပြုလုပ်နေသူများကို ဖော်ထုတ်အရေးယူဆောင်ရွက်လျက်ရှိကြောင်း ထုတ်ပြန်ခဲ့ပါတယ်။ နိုင်ငံခြားငွေကြေးများအား တရားမဝင် ဝယ်ယူ/ရောင်းချ/လဲလှယ်ခြင်းများကို ဆောင်ရွက်လျက်ရှိသည့် လူမှုကွန်ယက်စာမျက်နှာများအား စုံစမ်းဖော်ထုတ်လျက်ရှိပြီး လက်ရှိအချိန်အထိ လူမှုကွန်ယက် စာမျက်နှာ ၁,၂၀၁ ခု အား စိစစ်အရေးယူဆောင်ရွက်ခဲ့ရာ ငွေစာရင်းအကောင့်များအား မြန်မာနိုင်ငံတော်ဗဟိုဘဏ်က စိစစ်ခဲ့ပြီး ဆုံးရှုံးနိုင်ခြေအဆင့် မြင့်မားသည့် လူပုဂ္ဂိုလ်များအဖြစ်သတ်မှတ်၍ လူပုဂ္ဂိုလ် ၁,၃၄၂ ဦး၏ ငွေစာရင်းအကောင့် များအား ယာယီတားဆီးထားကြောင်း ထုတ်ပြန်ခဲ့ပါတယ်။ ထို့အတူ လူမှုကွန်ယက်စာမျက်နှာများတွင် USDT အရောင်းအဝယ်ပြုလုပ်ရန် ဖော်ပြထားသည့် ကြော်ငြာ များရှိ ဖုန်းနံပါတ်များ၊ ငွေစာရင်းအမှတ်များဖြင့် နိုင်ငံခြားငွေ အရောင်းအဝယ်ပြုလုပ်ခဲ့သည့် လူပုဂ္ဂိုလ် ၂၃၄ ဦးအား ဆုံးရှုံးနိုင်ခြေအန္တရာယ်မြင့်မားသော လူပုဂ္ဂိုလ်များအဖြစ်သတ်မှတ်၍ ၎င်းတို့၏ ဘဏ်အသီးသီးရှိ ငွေစာရင်းများ (ဘဏ်စာရင်းစုစုပေါင်း ၆၈၇ ခုနှင့် မိုဘိုင်းငွေရေးကြေးရေးစာရင်း ၂၈၇ ခု)အား ငွေစာရင်း ယာယီတားဆီး ထားသည့်အပြင် ပြစ်မှုကျုးလွန်ကြောင်းထင်ရှားသည့် လူပုဂ္ဂိုလ် ၅ ဦးအား တည်ဆဲဥပဒေများနှင့်အညီ တရားစွဲဆို၍ တရားဥပဒေအရ ပြစ်ဒဏ်ချမှတ်ထားပြီး ကျန်လူပုဂ္ဂိုလ်များကိုလည်း ဥပဒေနှင့်အညီ အရေးယူနိုင်ရေး ဆက်လက် ဆောင်ရွက်လျက်ရှိကြောင်း ထုတ်ပြန်ချက်မှာ ပါရှိပါတယ်။ နိုင်ငံခြားငွေကြေးများ တရားမဝင် ရောင်းချလဲလှယ်ခြင်းများ ဆောင်ရွက်လျက်ရှိသည့် လူမှုကွန်ရက် စာမျက်နှာများဖြစ်သော ငွေဈေးနှုန်းနှင့်ငွေလွှဲဆိုင်၊ Moe Latt၊ Si Thu & bro များ၊ ရန်ကုန်ငွေဈေး၊ ဒေါ်လာ ဝယ်ရောင်းတိုက်ရိုက် USD Exchange၊ ဒေါ်လာရောင်းဝယ်၊ December Snow၊ June Lin Htet Naing၊ Htet Yan Money Exchange၊ Global Value Services-GVS Money Exchange and Transfer၊ Boss Online Money Exchange Services(Family Money Exchange)၊ Lucky Sky Gold Smith(Facebook Page)၊ Nay Myo Htet (Facebook Page)၊ Gold Market Myanmar(Facebook Page)၊ Ye Mon နှင့် Naing Lu စသည့် လူမှုကွန်ယက်စာမျက်နှာများအား အရေးယူဆောင်ရွက်ပြီးဖြစ်တယ်လို့ ထုတ်ပြန်ချက်အရ သိရပါတယ်။ ဗဟိုဘဏ်အနေဖြင့် ပြည်ထဲရေးဝန်ကြီးဌာန၊ တရားဥပဒေစိုးမိုးရေး အဖွဲ့အစည်းများနှင့် ပူးပေါင်းပြီး တရားမဝင်နိုင်ငံခြားငွေကြေးများ ဝယ်ယူ/ရောင်းချ/လဲလှယ်ခြင်းကို ဆောင်ရွက်လျက်ရှိသည့် လူပုဂ္ဂိုလ်/ အဖွဲ့အစည်း များအား အရေးယူနိုင်ရေး စိစစ်ဖော်ထုတ်ခြင်းကို ဆောင်ရွက်လျက်ရှိရာ ကျော်စောသတင်း ပေါ်ပေါက်သူများအား စစ်ဆေးမေးမြန်းခြင်းနှင့် ယင်းကျော်စောသူများ၏ ဘဏ်စာရင်းများနှင့် ဘဏ်စနစ်ကို အသုံးပြု၍ ငွေလွှဲပြောင်းခြင်း များအား စိစစ်၍ အရေးယူနိုင်ရေးကိုလည်း ဆောင်ရွက်လျက်ရှိပြီး ၎င်းအဖွဲ့အစည်းများကို အများပြည်သူ သတိပြု ဆင်ခြင်နိုင်ရန် မကြာခဏ အသိပေးဆောင်ရွက်လျက်ရှိကြောင်း ထုတ်ပြန်ချက်မှာ ပါရှိပါတယ်။ ထို့အပြင် ငွေကြေးလိမ်လည်မှုများအား အချိန်မီတားဆီးရေးနှင့် အရေးယူမှု မြန်ဆန်ရေးအတွက် လုပ်ငန်း အဖွဲ့(Action Task Force)ကို ဖွဲ့စည်းထားပြီး လူမှုကွန်ယက်စာမျက်နှာများမှ ရရှိသည့် သတင်း အချက်အလက်များ အရလည်းကောင်း၊ Action Task Force သို့လိပ်မူ၍ ရရှိလာသည့် တိုင်ကြားချက်များ၊ ဘဏ်များ၏ သတင်း ပေးပို့ချက်များ၊ သက်ဆိုင်ရာတရားဥပဒေစိုးမိုးရေးအဖွဲ့၏ သတင်းပေးပို့ချက်များအရ အမှုဖွင့်အရေးယူ ဆောင်ရွက် လျက်ရှိသည့် မှုခင်းဖြစ်စဉ်များမှ လူပုဂ္ဂိုလ်များအား တည်ဆဲဥပဒေများနှင့်အညီ အရေးယူနိုင်ရေး ဆောင်ရွက်လျက် ရှိကြောင်း ထုတ်ပြန်ချက်တွင် ထည့်သွင်းဖော်ပြခဲ့ပါတယ်။ ထို့ကြောင့် တရားမဝင်နိုင်ငံခြားငွေကြေးများ ဝယ်ယူ/ရောင်းချ/လဲလှယ်ခြင်းများနှင့် အွန်လိုင်းမှတစ်ဆင့် ငွေကြေးလိမ်လည်မှုများက အများပြည်သူအကျိုးကို ထိခိုက်စေသည့်အပြင် နိုင်ငံတော်ငွေရေးကြေးရေးစနစ် တည်ငြိမ်မှုများအပေါ် ပျက်ပြားစေသည့်အတွက် အများပြည်သူများအနေဖြင့် အထက်ပါကိစ္စရပ်များအား မပြုလုပ်ကြ ပါရန်နှင့် ဖောက်ဖျက်ကျူးလွန်ကြောင်း တွေ့ရှိပါက ငွေစာရင်းပိတ်သိမ်းခြင်းအပြင် နိုင်ငံခြားသုံးငွေစီမံခန့်ခွဲမှု ဥပဒေပုဒ်မ ၃၈ နှင့် ၄၂ တို့အရလည်းကောင်း၊ ငွေကြေးခဝါချမှုတိုက်ဖျက်ရေး ဥပဒေအရလည်းကောင်း၊ ငွေရေး ကြေးရေးအဖွဲ့အစည်းများ ဥပဒေအရလည်းကောင်း ရာဇသတ်ကြီး ဥပဒေပုဒ်မများဖြင့်ပါ အရေးယူဆောင်ရွက် သွားမည်ဖြစ်ကြောင်း အသိပေးထုတ်ပြန်ခဲ့ပါတယ်။(NVS 004)