ပါတီစုံဒီမိုကရေစီအထွေထွေရွေးကောက်ပွဲ အပိုင်း(၃)ကို ၂၀၂၆ ခုနှစ်၊ ဇန်နဝါရီလ ၂၅ ရက် (တနင်္ဂနွေနေ့)၌ ကျင်းပသွားမှာဖြစ်ကြောင်းနဲ့ ပါဝင်သည့် မြို့နယ် ၆၃ မြို့နယ်တို့ရဲ့ တိုင်းဒေသကြီးနှင့်ပြည်နယ်အလိုက် စာရင်းများကို ပြည်ထောင်စုရွေးကောက်ပွဲကော်မရှင်(UEC)က ဒီဇင်ဘာလ ၂၅ ရက်မှာ ထုတ်ပြန်ကြေညာခဲ့ပါတယ်။ အဆိုပါ ရွေးကောက်ပွဲအပိုင်း(၃)တွင် ပါဝင်သည့် မြို့နယ်များမှာ ကချင်ပြည်နယ်တွင် ၅ မြို့နယ်၊ ကရင်ပြည်နယ်တွင် ၂ မြို့နယ်၊ စစ်ကိုင်းတိုင်းဒေသကြီးတွင် ၂ မြို့နယ်၊ တနင်္သာရီတိုင်းဒေသကြီးတွင် ၃ မြို့နယ်၊ ပဲခူးတိုင်းဒေသကြီးတွင် ၈ မြို့နယ်၊ မန္တလေးတိုင်းဒေသကြီးတွင် ၈ မြို့နယ်၊ ရန်ကုန်တိုင်းဒေသကြီးတွင် ၁၇ မြို့နယ်၊ ရှမ်းပြည်နယ်တွင် ၉ မြို့နယ်နှင့် ဧရာဝတီတိုင်းဒေသကြီးတွင် ၉ မြို့နယ်တို့ရဲ့ စာရင်းများကို ထုတ်ပြန်ခဲ့ပါတယ်။ ပါတီစုံဒီမိုကရေစီ အထွေထွေရွေးကောက်ပွဲ အပိုင်း(၁)ကို ဒီဇင်ဘာလ ၂၈ ရက်တွင် မြို့နယ် ၁၀၂ မြို့နယ်၌ ကျင်းပရန် ဩဂုတ်လ ၂၀ ရက်မှာ ကြေညာချက်အမှတ်(၅၆/၂၀၂၅)ဖြင့်လည်းကောင်း၊ အပိုင်း(၂)ကို လာမယ့် ၂၀၂၆ ခုနှစ်၊ ဇန်နဝါရီလ ၁၁ ရက်တွင် မြို့နယ် ၁၀၀ မြို့နယ်၌ ကျင်းပရန် အောက်တိုဘာလ ၂၈ ရက်မှာ ကြေညာချက်အမှတ် (၁၄၁/၂၀၂၅)ဖြင့်လည်းကောင်း သတ်မှတ်ကြေညာခဲ့ပြီး ဖြစ်ပါတယ်။(NVS 004)