ဆောင်းရာသီအတွင်း စပိန်နိုင်ငံသို့ သွားရောက်လည်ပတ်ရန် ရွေးချယ်သည့် တရုတ်နိုင်ငံမှ ခရီးသွားဧည့်သည် အရေအတွက် တိုးပွားလာခြင်းသည် နိုင်ငံ၏ သမားရိုးကျခရီးသွားပြက္ခဒိန်ကို ပြန်လည်ပုံဖော်လာပြီး ခရီးသွားလုပ်ငန်း ကဏ္ဍအတွက် အရှိန်အဟုန်သစ်များ ဖန်တီးပေးလျက်ရှိကြောင်း စပိန်ခရီးသွားလုပ်ငန်း လုပ်ကိုင်သူများက ပြောကြား ခဲ့သည်။ တရုတ်နိုင်ငံမှ ခရီးသွားဧည့်သည်များအကြား ဆောင်းရာသီခရီးသွားလာရန် စိတ်ဝင်စားမှုမြင့်တက်လာခြင်း သည် ရာသီဥတုအခြေအနေများ၊ ခရီးသွားလာရေးဆက်သွယ်မှု တိုးတက်လာခြင်းတို့နှင့် ဆက်စပ်ကြောင်း စပိန် နိုင်ငံ၏ ခရီးသွားလုပ်ငန်းရှေ့နေအဖွဲ့ Mesa del Turismo ၏ ဒုတိယဥက္ကဋ္ဌ Santiago Vallejo က ဆင်ဟွာ သတင်းဌာနသို့ ပြောကြားခဲ့သည်။ စပိန်နိုင်ငံ၏ အမျိုးသားခရီးသွားလုပ်ငန်းဘုတ်အဖွဲ့ Turespana မှထုတ်ပြန်သော အချက်အလက်များအရ စပိန်နိုင်ငံသည် ၂၀၂၄ ခုနှစ်တွင် တရုတ်နိုင်ငံမှ ခရီးသွားဧည့်သည် ၆၅၀,၀၀၀ ခန့်ကို လက်ခံခဲ့ကြောင်း၊ ယင်းမှာ ယခင်နှစ်ထက် ၆၆ ဒသမ ၇ ရာခိုင်နှုန်းခန့် တိုးလာခဲ့ခြင်းဖြစ်ပြီး အဆိုပါ တရုတ်ခရီးသွားဧည့်သည်များ၏ သုံးစွဲမှုမှာ ယူရို ၁ ဒသမ ၈ ဘီလီယံ (အမေရိကန်ဒေါ်လာ ၂ ဒသမ ၀၉ ဘီလီယံ)ကျော် ရှိခဲ့ကြောင်း သိရသည်။ ၂၀၂၅ ခုနှစ်အတွက် အလားအလာများမှာမူ ပို၍ပင်အားကောင်းလာပြီး ဆောင်းရာသီတွင် လေကြောင်းခရီးစဉ် ပြေးဆွဲနိုင်စွမ်းနှင့် ကြိုတင်စာရင်းပေးသွင်းမှုပမာဏ သိသိသာသာမြင့်တက်လာမှုတို့ကို ပြသနေကြောင်း အဆိုပါ ထုတ်ပြန်ချက်တစ်ခုတည်း၌ပင် ဖော်ပြခဲ့သည်။ “ခရီးသွားလုပ်ငန်းမှာ တိုက်ရိုက်လေယာဉ်ခရီးစဉ်တွေ မရှိမဖြစ် လိုအပ်ပါတယ်” ဟုလည်း Vallejo က ပြောကြားခဲ့သည်။ ၂၀၂၅-၂၀၂၆ ခုနှစ် ဆောင်းရာသီနှင့် နွေဦးရာသီအတွင်း တရုတ်နိုင်ငံနှင့် စပိန်နိုင်ငံအကြား တိုက်ရိုက် လေယာဉ်ခရီးစဉ်အရေအတွက်မှာ စံချိန်တင်အဆင့်သို့ ရောက်ရှိရန်ခန့်မှန်းရပြီး ကိုဗစ်-၁၉ ကပ်ရောဂါမတိုင်မီကထက် အပတ်စဉ်ချိတ်ဆက်မှုများ နှစ်ဆနီးပါး မြင့်တက်လာမည်ဟု ၎င်းက ပြောကြားခဲ့ခြင်းဖြစ်သည်။ တရုတ်နိုင်ငံမှ ခရီးသွားဧည့်သည်များအကြား ခရီးသွားလာမှုအလေ့အထများ ပြောင်းလဲလာမှုကိုလည်း Vallejo က ထောက်ပြခဲ့သည်။ “သူတို့က နေရာတစ်ခုကို ဒီအတိုင်းလည်ပတ်ချင်ကြရုံတင်မကဘဲ အဲဒီနေရာတွေရဲ့ ယဉ်ကျေးမှုနဲ့ အမွေအနှစ်တွေကိုပါ ထဲထဲဝင်ဝင် လေ့လာချင်ကြတာပါ” ဟု ၎င်းက ပြောကြားခဲ့သည်။ မကြာသေးမီနှစ်များအတွင်း စပိန်နိုင်ငံ၏ ခရီးသွားလုပ်ငန်းကဏ္ဍသည် မြို့ကြီးများတွင် ယဉ်ကျေးမှုဆိုင်ရာ တင်ဆက်မှုများကို တိုးချဲ့လာခဲ့ပြီး ပြတိုက်အတွေ့အကြုံများ၊ ပြပွဲများနှင့် လမ်းလျှောက်ခရီးစဉ်များကို တိုးတက် ကောင်းမွန်အောင် လုပ်ဆောင်ခဲ့သည်။ ငွေပေးချေမှုစနစ်များကိုလည်း တရုတ်နိုင်ငံမှ ခရီးသွားဧည့်သည်များ၏ အကြိုက်များနှင့်အညီ လိုက်လျောညီထွေဖြစ်အောင် ပြုလုပ်ထားပြီး အဓိကဈေးဝယ်စင်တာများတွင် ဝယ်ယူမှုများနှင့် အခွန်ပြန်အမ်းငွေများအတွက် Alipay နှင့် WeChat Pay တို့ကို လက်ခံလာကြသည်။ တရုတ်နိုင်ငံမှ ခရီးသွားဧည့်သည်များ၏ ၈၀ ရာခိုင်နှုန်းကျော်သည် လွတ်လပ်စွာခရီးသွားခြင်းနှင့် ဟိုတယ်တွင် နေထိုင်ခြင်းတို့ကို ရွေးချယ်ကြပြီး ခရီးစဉ်များအား တန်ဖိုးပိုမိုမြင့်မားစေခဲ့သည့် ၎င်းတို့၏ အဓိကလုပ်ဆောင်ချက် များအနက် ဈေးဝယ်ခြင်း၊ ယဉ်ကျေးမှုဆိုင်ရာလည်ပတ်ခြင်းနှင့် မြို့ပြရှုခင်းများကို အဆင့်သတ်မှတ်ခြင်းတို့ ပါဝင် ကြောင်း Turespana ၏ ကိန်းဂဏန်းများက ဖော်ပြခဲ့သည်။ “တရုတ်ခရီးသွားဧည့်သည်တွေ ရှာဖွေနေတဲ့အရာကို ကျွန်တော်တို့ နားလည်ဖို့ လိုပါတယ်” ဟု Vallejo က ပြောကြားခဲ့ပြီး ယင်းဝယ်လိုအားပြောင်းလဲမှုသည် ယာယီမဟုတ်ဘဲ ရေရှည်သဘောသဘာဝရှိကြောင်း ထောက်ပြ ခဲ့သည်။ “မြို့ပြအတွေ့အကြုံတွေ၊ ယဉ်ကျေးမှု၊ လမ်းညွှန်မှုနှင့် ဒစ်ဂျစ်တယ်ဝန်ဆောင်မှုတွေ တိုးတက်ကောင်းမွန် လာစေရေးအပါအဝင် ခရီးသွားလုပ်ငန်းကဏ္ဍအနေနဲ့ လိုက်လျောညီထွေဖြစ်အောင် လုပ်ဆောင်ရမှာဖြစ်ပါတယ်” ဟု ၎င်းက ဆိုသည်။ Vallejo က တိုးတက်မှုအား ပိုမိုပံ့ပိုးပေးနိုင်သည့် မူဝါဒဖွံ့ဖြိုးတိုးတက်မှုများကိုလည်း မီးမောင်းထိုးပြခဲ့သည်။ တရုတ်နိုင်ငံက စပိန်နိုင်ငံအပါအဝင် နိုင်ငံများစွာမှ နိုင်ငံသားများအတွက် ဗီဇာကင်းလွတ်ခွင့်မူဝါဒကို ၂၀၂၆ ခုနှစ် နှစ်ကုန်အထိ သက်တမ်းတိုးခဲ့ကြောင်း၊ ယင်းက ခရီးသွားလုပ်ငန်း၊ စီးပွားရေးနှင့် ယဉ်ကျေးမှုဖလှယ်မှုများကို အပြန်အလှန်နည်းလမ်းအားဖြင့် လွယ်ကူချောမွေ့စေမည်ဟုလည်း ၎င်းက ပြောကြားခဲ့ကြောင်း သိရသည်။ (Repost from Xinhua Myanmar)