လွန်ခဲ့သောသီတင်းပတ်အတွင်း တောင်အာရှနှင့် အရှေ့တောင်အာရှတစ်ဝန်းရှိ နိုင်ငံများတွင် မိုးသည်း ထန်စွာရွာသွန်းခဲ့ပြီး ရေကြီးရေလျှံ ဖြစ်ပွားမှုများကြောင့် သေဆုံးမှုများနှင့် ပျက်စီးဆုံးရှုံးမှုများ ဖြစ်ပွားခဲ့သည်။ အင်အားပြင်း ဆိုင်ကလုန်းမုန်တိုင်းတစ်ခုသည် သီရိလင်္ကာကို ဖြတ်ကျော်ဝင်ရောက်ခဲ့သောကြောင့် သီရိလင်္ကာနိုင်ငံသည် မကြာသေးမီနှစ်များအတွင်း အဆိုးရွားဆုံး ရာသီဥတုဘေးဒဏ်နှင့် ရင်ဆိုင်ခဲ့ရပြီး ရေကြီး ခြင်းနှင့် မြေပြိုခြင်းများကြောင့် အနည်းဆုံး ၅၆ ဦးသေဆုံးခဲ့သည်ဟု သဘာဝဘေးအန္တရာယ် စီမံခန့်ခွဲရေး အရာရှိများက ပြောကြားခဲ့သည်။ အဆိုပါမုန်တိုင်းသည် ယခုသီတင်းပတ်ကုန်အထိ အင်အားကောင်းနိုင်ဖွယ်ရှိပြီး နိုင်ငံအရှေ့ဘက် ကမ်းရိုးတန်းတစ်လျှောက် မြောက်ဘက်သို့ ရွေ့လျားလျက်ရှိသည်။ ထို့ပြင် သီးခြားမုန်တိုင်းတစ်ခုကြောင့် အင်ဒိုနီးရှားနိုင်ငံ၌ မိုးသည်းထန်စွာရွာသွန်းခဲ့ပြီး ဆူမားတြားကျွန်း အနောက်ပိုင်းကျွန်းစုတွင် အကြီးအကျယ် ထိခိုက်ပျက်စီးခဲ့သည်။ နိုဝင်ဘာလ ၂၈ ရက် ညနေပိုင်းအထိ သေဆုံးသူ ၁၇၄ ဦးရှိခဲ့ပြီး ဒါဇင်နှင့်ချီ ပျောက်ဆုံး လျက်ရှိသည်ဟု အဆိုပါအရာရှိများက ပြောသည်။ ထိုင်းနိုင်ငံတောင်ပိုင်း ဟတ်ယိုင်မြို့ အပါအဝင် အချို့ဒေသများတွင် ရေပြန်ကျစပြုလာသဖြင့် လတ်တလောရေကြီးမှုကြောင့် ပျက်စီးဆုံးရှုံးမှုများ ပိုမိုမြင်သာလာသည်။ လမ်းများနှင့် တံတားများကို ရွှံ့ညွန်များ ဖုံးလွှမ်းလျက်ရှိပြီး ယာဉ်အပျက်အစီး အပိုင်းအစများကို အဓိကလမ်းမကြီးများပေါ်တွင် တွေ့မြင်ရသည်။ အာဏာပိုင်များသည် ကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်မြှင့်လုပ်ဆောင် လျက်ရှိပြီး နိုဝင်ဘာ ၂၈ ရက်အထိ သေဆုံးသူ ၁၄၅ ဦးအထိရှိလာပြီဖြစ်ကြောင်း သိရသည်။