အသက် ၁၅ နှစ်အောက် ကလေးများ လူမှုမီဒီယာသုံးစွဲမှုပိတ်ပင်ရန် စီစဉ်ထားကြောင်း ဒိန်းမတ်အစိုးရက နိုဝင်ဘာလ ၇ ရက်တွင် သတင်းထုတ်ပြန်ထားသည်။ ကလေးငယ်များ လူမှုမီဒီယာသုံးစွဲမှုကိုကန့်သတ်ရန် ဒိန်းမတ်ဝန်ကြီးချုပ် မက်တီဖရက်ဒရစ်ဆင် က ပြီးခဲ့သည့်လအတွင်း တိုက်တွန်းခဲ့ပြီးနောက် အသက် ၁၅ နှစ်အောက်ကလေးများ လူမှုမီဒီယာသုံးစွဲမှုကို ပိတ်ပင်ရန် ဒိန်းမတ်အစိုးရက စီစဉ်ထားခြင်းဖြစ်သည်။ အသက် ၁၅ နှစ်အောက်ကလေးများ လူမှုမီဒီယာသုံးစွဲမှု ပိတ်ပင် ရေးအစီအစဉ်ကို ဒိန်းမတ်လွှတ်တော်အတွင်းရှိ နိုင်ငံရေးပါတီအများစုက သဘောတူထားကြောင်း ဒိန်းမတ် ဒစ်ဂျစ်တယ် နည်းပညာဝန်ကြီးဌာန ဝန်ကြီး ကာရိုလင်း စတာဂီအော်လ်ဆန် က သတင်းထုတ်ပြန်ထားသည်။ လူမှုမီဒီယာများကို အလွန်အကျွံသုံးစွဲမှုကြောင့် ကလေးများ၏ စိတ်ကျန်းမာရေးအပေါ် ဆိုးကျိုး သက်ရောက်မှုရှိလာမည့်အရေးကို ဒိန်းမတ်အစိုးရက စိုးရိမ်နေကြောင်း သိရသည်။ ဒိန်းမတ်ကလေးငယ်များ သုံးစွဲမှုအများဆုံး လူမှုမီဒီယာများထဲတွင် Youtube၊ Instagram၊ Tik Tok၊ Snapchat တို့လည်း ပါဝင်နေသည်။ လူမှုမီဒီယာများသည် ဒိန်းမတ်ကလေးငယ်များ၏ အချိန်၊ ကလေးဘဝနှင့် ကျန်းမာရေးတို့ကို ဖျက်ဆီး နေကြောင်း ဒိန်းမတ်ဒစ်ဂျစ်တယ် နည်းပညာဝန်ကြီးက ပြောကြားခဲ့သည်။