ဂါဇာငြိမ်းချမ်းရေးအစီအစဉ်တွင် ပါဝင်သောအချက် ၂ဝ ကို အခြေခံ၍ အစ္စရေးနှင့်ဟားမတ်စ်တို့သည် ပစ်ခတ်တိုက်ခိုက်မှုရပ်စဲရေးသဘောတူညီချက်တစ်ခု မကြာမီရရှိနိုင်မည်ဟု ယုံကြည်ကြောင်း အမေရိကန်သမ္မတ ဒေါ်နယ်ထရမ့် က ပြောကြားလိုက်သည်။ သဘောတူညီချက်တစ်ခုပြုလုပ်ရန် ကောင်းမွန်သည့် အခွင့်အလမ်း တစ်ခုရှိပြီး အဆိုပါသဘောတူညီချက်သည် ရေရှည်ခိုင်မြဲသည့် သဘောတူညီချက်တစ်ခုဖြစ်လိမ့်မည်ဖြစ်ကြောင်း သမ္မတ ထရမ့် က အောက်တိုဘာလ ၆ ရက်တွင် သတင်းထောက်များကို ပြောကြားလိုက်သည်။ ဟားမတ်စ် က ကျေနပ်စွာတုံ့ပြန်ခဲ့ပြီး ယင်းပုံစံအတိုင်း ဆက်လက်တည်ရှိနေဦးမည်ဟုလည်း ၎င်းက ပြောကြားသည်။ အစ္စရေးနှင့် ဟားမတ်စ်တို့သည် အီဂျစ်တွင် အောက်တိုဘာလ ၆ ရက်က သွယ်ဝိုက်ဆွေးနွေးမှုများ စတင်ခဲ့သည်။ အီဂျစ်သည် အစ္စရေးနှင့်ဟားမတ်စ်တို့ကြား စေ့စပ်ညှိနှိုင်းသူအဖြစ် ဆောင်ရွက်ခဲ့ပြီး ဆွေးနွေးပွဲတွင် ဓားစာခံများလွှတ်ပေးရေး၊ အစ္စရေးတပ်ဖွဲ့ တချို့တဝက် ဆုတ်ခွာပေးရေးနှင့် ပတ်သက်သည့်အကြောင်းအရာများ ဆွေးနွေးမည်ဟု ယုံကြည် ရသည်။ ဆွေးနွေးညှိနှိုင်းမှုများ လုပ်ဆောင်နေသော်လည်း လွန်ခဲ့သော ၂၄ နာရီအတွင်း အစ္စရေးတို့၏တိုက်ခိုက်မှု ကြောင့် လူ ၂၁ ဦး သေဆုံးခဲ့သည်ဟု ဂါဇာကျန်းမာရေးအရာရှိများက စက်တင်ဘာလ ၆ ရက်တွင် ပြောကြား လိုက် သည်။ အစ္စရေးကို ဟားမတ်စ်က စီးနင်းတိုက်ခိုက်ခဲ့ရာ လူ ၁,၂၀၀ ခန့်သေဆုံးပြီး တခြား ၂၅၀ ကျော်ကို ဖမ်းဆီး ခေါ်ဆောင်သွားခဲ့သည်မှာ အောက်တိုဘာလ ၇ ရက်ဆိုလျှင် နှစ်နှစ်ပြည့်ပြီဖြစ်သည်။ ဟားမတ်စ် တို့သည် ဓားစာခံ ၄၈ဦးကို မလွှတ်ပေးသေးကြောင်း သိရသည်။ အစ္စရေးသည် ဂါဇာ၌ စစ်ဆင်ရေးများဆောင်ရွက်ခြင်းကြောင့် လူဦးရေ ၆၇,၀၀၀ ကျော်သေဆုံးခဲ့သည်။ ထို့ပြင် အာဟာရချို့တဲ့မှုနှင့် အခြားအချက်များကြောင့် လူပေါင်း ၄၆၀ သေဆုံးခဲ့ကြောင်းသိရသည်။ ယခုအချိန်တွင် ဂါဇာကမ်းမြောင်ဒေသသည် လူသားချင်းစာနာထောက်ထားမှုဆိုင်ရာ အကျပ်အတည်းနှင့်ရင်ဆိုင်နေရသည်ဟု NHK သတင်းဌာနဖော်ပြချက်အရ သိရသည်။