မြန်မာ့အနာဂတ်စာမျက်နှာလူငယ်မဟာဗျူဟာဖိုရမ် ၂၀၂၅ (Youth Forum)သို့ တက်ရောက်ခဲ့တဲ့ တိုင်းဒေသကြီး နှင့်ပြည်နယ်အသီးသီးတို့မှ ကိုယ်စားပြုလူငယ်များက အမျိုးသားပြတိုက်(ရန်ကုန်)ကို သွားရောက်လေ့လာခဲ့ကြပါတယ်။ စက်တင်ဘာလ ၂ ရက်က ကျောင်းသား ၂၀၀ ဦး၊ ကျောင်းသူ ၂၄၇ ဦး စုစုပေါင်း ၄၄၇ ဦးတို့ကို တိုင်းဒေသကြီးနှင့် ပြည်နယ်များမှ လူမှုရေးဝန်ကြီးများ ဦးဆောင်၍ လေ့လာခဲ့ခြင်းဖြစ်ပါတယ်။ မြန်မာ့အနာဂတ်မျက်နှာစာ လူငယ်မဟာ ဗျူဟာဖိုရမ် ၂၀၂၅ ကို ဩဂုတ်လ ၃၀ ရက်မှ စက်တင်ဘာလ ၁ ရက်အထိ ရန်ကုန်မြို့၊ မင်းဓမ္မလမ်းပေါ်ရှိ MCC ခန်းမ၌ ကျင်းပပြုလုပ်နေခဲ့တာ ဖြစ်ပါတယ်။ အဆိုပါဖိုရမ်ကို နိုင်ငံတကာရေးရာ၊ ပထဝီနိုင်ငံရေး၊ အမျိုးသားမဟာဗျူဟာနှင့်ပတ်သက်တဲ့ အခြေခံအသိပညာ ဗဟုသုတများရရှိစေရန်နှင့် လူငယ်များအကြား ခေါင်းဆောင်မှု၊ စူးစမ်းစဉ်းစားနိုင်မှုနှင့် ဆက်သွယ်ရေးကျွမ်းကျင်မှု အရည်အချင်းများ မြှင့်တင်နိုင်ရန် ပြန်ကြားရေးဝန်ကြီးဌာန၊ အားကစားနှင့်လူငယ်ရေးရာဝန်ကြီးဌာန၊ ရန်ကုန်တိုင်းဒေသ ကြီးအစိုးရအဖွဲ့ နှင့် မြန်မာ့ပုံရိပ်ဖော်ညွှန်းရေးအဖွဲ့တို့က ပူးတွဲစီစဉ်ကျင်းပခဲ့တာ ဖြစ်ပါတယ်။ (NVS 004)