“စွန့်လွှတ်နှလုံးသားဖောင်ဒေးရှင်းက နေပြည်တော်ရှိ မြို့နယ် ၃ ခုမှ ငလျင်ဒဏ်သင့် အိမ်ထောင်စု ၉၅၀ အတွက် ထောက်ပံ့ငွေကျပ် ၃,၄၂၀ သိန်းလှူဒါန်း”
13 May
နေပြည်တော်ရှိ ပျဉ်းမနား၊ လယ်ဝေးနှင့် တပ်ကုန်းမြို့နယ်တို့မှ မန္တလေးငလျင်ကြီးဒဏ်သင့် အိမ်ထောင်စု ၉၅၀ အတွက် ထောက်ပံ့ငွေကျပ် ၃,၄၂၀ သိန်းကို စွန့်လွှတ်နှလုံးသားဖောင်ဒေးရှင်းက မေလ ၁၂ ရက် နေ့လယ်ပိုင်မှာ နေပြည်တော်ကောင်စီရုံး၌ ထောက်ပံ့လှူဒါန်းခဲ့ကြောင်း သိရပါတယ်။ ထောက်ပံ့လှူဒါန်းပွဲ၌ နေပြည်တော်ကောင်စီဝင် ဗိုလ်မှူးကြီးရဲမိုးက ငလျင်ဒဏ်သင့်ခဲ့ရတဲ့ ဒေသများတွင် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို သွားရောက်ကြီးကြပ်ပြီး အမြန်ဆုံးဆောင်ရွက် ပေးလျက်ရှိကြောင်း ပြောကြားခဲ့ပါတယ်။ အဆိုပါစွန့်လွှတ်နှလုံးသားဖောင်ဒေးရှင်းမှ ထောက်ပံ့လှူဒါန်းတဲ့ ထောက်ပံ့ငွေ ကျပ် ၃,၄၂၀ သိန်းကို နေပြည်တော်ကောင်စီဝင် ဗိုလ်မှူးကြီး ရဲမိုး ကလက်ခံရယူခဲ့ပြီးနောက် နေပြည်တော်ကောင်စီဝင် ဦးမြင့်စိုး က နေပြည်တော် လူမှုဝန်ထမ်းဦးစီးဌာနနှင့် နေပြည်တော်လမ်းကြီးကြပ်ရေးအဖွဲ့သို့ ထောက်ပံ့ငွေများနှင့် နေပြည်တော်ကောင်စီမှ လှူဒါန်းသည့် ပန်းပေါင်းစုံဗုဒ္ဓရုပ်ပွားတော်များအား ပေးအပ်ခဲ့ကြောင်း သိရပါတယ်။ ထို့နောက် နေပြည်တော်ကောင်စီဝင် ဗိုလ်မှူးကြီး ရဲမိုး နှင့် ဦးမြင့်စိုး တို့က ငလျင်ဒဏ်ကြောင့် ထိခိုက်ပျက်စီးခဲ့တဲ့ ပျဉ်းမနားမြို့၊ ရွာကောက်ရပ်ကွက် ဈေးကုန်းကျောင်းတိုက်၊ လယ်ဝေးမြို့၊ သစ်စိမ့်ပင်ကျေးရွာအုပ်စု၊ ဗောဓိကုန်းကျေးရွာ ဗောဓိကုန်းကျောင်းတိုက်နှင့် လယ်ဝေးမြို့၊ အမှတ်(၁)ရပ် ကွက်၊ ဇမ္ဗူအေးကျောင်းများသို့သွားရောက်၍ သွပ်၊ မိုးကာနှင့် ဖျာများကိုလှူဒါန်းခဲ့ကြောင်း သိရပါတယ်။ (NVS 004)
