မြန်မာနိုင်ငံ၌ မတ်လ ၂၈ ရက် (သောကြာနေ့)ကလှုပ်ခတ်ခဲ့သည့် အင်အားကြီးငလျင်အပြီးတွင် ဂျပန်နိုင်ငံက ငလျင်ဆိုင်ရာကျွမ်းကျင်ပညာရှင်အဖွဲ့အား စေလွှတ်ခဲ့ရာ မတ်လ ၃၁ ရက်မှာ ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိလာပြီဖြစ်တယ်လို့ သိရပါတယ်။ အဆိုပါမစ်ရှင်အဖွဲ့ကို ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) မှ စီစဉ်ဆောင်ရွက် ခဲ့ခြင်းဖြစ်ပါတယ်။ ဂျပန်နိုင်ငံခြားရေးဝန်ကြီးဌာနရဲ့ ပြောကြားချက်အရအဖွဲ့ဝင်ငါးဦးပါဝင်ပြီး JICA ဝန်ထမ်းများနှင့် ဆေးဘက်ဆိုင်ရာဝန်ထမ်းများလည်းပါဝင်ကြောင်း သိရပါတယ်။ ၎င်းတို့ရဲ့ အဓိကအခန်းကဏ္ဍမှာ မြေပြင်ရှိ လိုအပ်ချက်များနှင့် လုံခြုံရေးအခြေအနေများကို အကဲဖြတ်ရန်၊ ဂျပန်သဘာဝဘေးအန္တရာယ် ကယ်ဆယ်ရေးအဖွဲ့ရဲ့ တပ်ဖြန့်မှုကို ညှိနှိုင်းဆောင်ရွက်ရန်ဖြစ်တယ်လို့ သိရပါတယ်။ တစ်ချိန်တည်းမှာပင် ဂျပန်အစိုးရဟာ JICA မှတစ်ဆင့် သဘာဝဘေးဒဏ်သင့်သူများအား ထောက်ပံ့ရန်အတွက် အစားအစာ၊ ရေနှင့်ဆေးဝါးပစ္စည်းများအပါအဝင် အရေးပေါ် အကူအညီများ စတင်ပြင်ဆင်နေပြီ ဖြစ်ပါတယ်။(NVS 004)