မလေးရှားနိုင်ငံက မြန်မာနိုင်ငံရှိ ငလျင်ဘေးဒဏ် ကြုံခဲ့ရသူများအတွက် လူသားချင်းစာနာထောက်ထားမှု အကူအညီအဖြစ် ရင်းဂစ် ၁၀ သန်း ကို ထောက်ပံ့သွားမည်ဖြစ်ကြောင်း ဝန်ကြီးချုပ် ဒါတွတ် ဆရီ အန်ဝါ အီဘရာဟင် က ပြောကြားခဲ့ပါတယ်။ ဆက်လက်ပြီး ဝန်ကြီးချုပ်က အခုထောက်ပံ့ကူညီမှုဟာ ၂၀၂၅ အာဆီယံအလှည့်ကျ ဥက္ကဋ္ဌဖြစ်သော မလေးရှားနိုင်ငံရဲ့ တာဝန်ယူမှုနှင့် စည်းလုံးညီညွတ်မှုကို ထင်ဟပ်စေကြောင်းပြောကြားခဲ့ပြီး လူသားချင်းစာနာမှု မစ်ရှင်ကို ဦးဆောင်ရန်အတွက် လာမယ့်သီတင်းပတ်တွင် နိုင်ငံခြားရေးဝန်ကြီး ဒါတွတ်ဆရီ မိုဟာမက် ဟာဆန်ကို မြန်မာနိုင်ငံသို့ သွားရောက်ရန် ညွှန်ကြားထားကြောင်း ပြောကြားခဲ့ပါတယ်။ အဆိုပါခရီးစဉ်ဟာ မြေပြင်မှာ တပ်ဖြန့် ချထားသော နိုင်ငံတော်သဘာဝဘေး စီမံခန့်ခွဲရေးအေဂျင်စီ (Nadma) အဖွဲ့ရဲ့ ကြိုးပမ်းဆောင်ရွက်မှုများ အပါအဝင် ရှာဖွေရေးနှင့် ကယ်ဆယ်ရေးလုပ်ငန်းများကို ဆက်လက်ဆောင်ရွက်ရာမှာ မလေးရှားနိုင်ငံ၏ ခိုင်မာသော ပံ့ပိုးကူညီမှု ကို ပြသရန် ရည်ရွယ်တယ်လို့ ပြောကြားခဲ့ပါတယ်။ လူသားချင်းစာနာထောက်ထားမှုမစ်ရှင်နှင့် ရှာဖွေကယ်ဆယ်ရေးလုပ်ငန်းများမှာ ကူညီဆောင်ရွက်ရန် Nadma လက်အောက်ရှိ မလေးရှား အထူးရှာဖွေ ကယ်ဆယ်ရေးအဖွဲ့ (SMART) ၏ အဖွဲ့ဝင် ၅၀ ပါ သောအဖွဲ့တစ်ဖွဲ့က နေပြည်တော်သို့ ထွက်ခွာလာပြီဖြစ်ကြောင်း သိရပါတယ်။ ယခုကဲ့သို့ လူသားချင်းစာနာထောက်ထားမှုဆိုင်ရာ အကြပ်အတည်းများကို ဖြေရှင်းရာတွင် အာဆီယံနိုင်ငံ များအကြား ပူးပေါင်းဆောင်ရွက်မှုနှင့် စုပေါင်းလုပ်ဆောင်မှုသည် အရေးကြီးကြောင်း အန်ဝါ က ပြောကြားခဲ့ပါတယ်။ အာဆီယံရဲ့ဦးစားပေးအရာက ဒေသတွင်းပြည်သူများ ကောင်းကျိုးချမ်းသာကို ကာကွယ်စောင့်ရှောက်ရာမှာ လျင်မြန်၊ ထိရောက်ပြီး ကျယ်ကျယ်ပြန့်ပြန့်ပါဝင်လုပ်ဆောင်မှုအဖြစ် ပြောင်းလဲရမည်ဖြစ်ကြောင်းလည်း ဆိုခဲ့ပါတယ်။ မလေးရှားနိုင်ငံက မြန်မာနိုင်ငံအတွက် အကူအညီများကို ပေါင်းစပ်ညှိနှိုင်းရန်နှင့် ထိခိုက်နစ်နာသူများ အတွက် အဓိပ္ပာယ်ရှိသော အကျိုးသက်ရောက်မှုရှိစေရန် အာဆီယံမိတ်ဖက်များနှင့် ဆက်လက်ဆွေးနွေးသွားမည် ဖြစ်ကြောင်း အန်ဝါ က ပြောကြားခဲ့ပါတယ်။ (NVS 004)