နေပြည်တော်အပါအဝင် တိုင်းဒေသကြီးနှင့်ပြည်နယ်အများစုမှာ မတ်လ ၂၈ ရက်မွန်းတည့်ပိုင်းက လှုပ်ခတ် ခဲ့တဲ့ အင်အားအလွန်ပြင်းထန်သော ငလျင်ဒဏ်ကြောင့် ဓာတ်အားလိုင်းများ၊ ဓာတ်အားခွဲရုံများ၊ ထရန်စဖော်မာများနှင့် ဆက်စပ်ပစ္စည်းများပျက်စီးချို့ယွင်းမှုများဖြစ်ပေါ်ခဲ့ပြီး လျှပ်စစ်ဓာတ်အားပြတ်တောက်မှုများ ဖြစ်ပေါ်လျက်ရှိသည်ဟု လျှပ်စစ်စွမ်းအားဝန်ကြီးဌာနက အသိပေးထားပါတယ်။ ပျက်စီးချို့ယွင်းမှု ဖြစ်ပေါ်ခဲ့မှုများအနက် နေပြည်တော်ရှိ လျှပ်စစ်ဓာတ်အားပို့လွှတ်ရေးလိုင်းများနှင့် ပင်မဓာတ်အားခွဲရုံ ပျက်စီးခဲ့မှုများကို လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနမှ လျှပ်စစ်ကျွမ်းကျင် ဝန်ထမ်း ၁၃၄ ဦး၊ ဓာတ်အားဖြန့်ဖြူးရေးလိုင်းများနှင့် ဓာတ်အားခွဲရုံများ ပြန်လည်ပြုပြင်နိုင်ရန် နေပြည်တော်ရှိ လျှပ်စစ်ကျွမ်းကျင်ဝန်ထမ်းများအပြင် ရန်ကုန်တိုင်းဒေသကြီး၊ ပဲခူးတိုင်းဒေသကြီးနှင့် မကွေးတိုင်းဒေသကြီးတို့မှ လျှပ်စစ်ကျွမ်းကျင်ဝန်ထမ်း ၄၂၆ ဦး(စုစုပေါင်းဝန်ထမ်းအင်အား ၅၆၀ ဦး)တို့နဲ့ ဓာတ်အားအမြန်ပို့လွှတ် ဖြန့်ဖြူးနိုင်ရေး အတွက် ကြိုးပမ်းဆောင်ရွက်လျက်ရှိတယ်လို့ အသိပေးထားပါတယ်။ ထို့အတူ မန္တလေးတိုင်းဒေသကြီးအတွင်း ပျက်စီးမှုများကို အမြန်ဆုံးပြင်ဆင်နိုင်ရန် မန္တလေးတိုင်းဒေသကြီး အတွင်းရှိ လျှပ်စစ်ကျွမ်းကျင်ဝန်ထမ်းများအပြင် ဧရာဝတီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့မှ လျှပ်စစ်ကျွမ်းကျင်ဝန်ထမ်း ၅၄၅ ဦးတို့နဲ့ ဓာတ်အားအမြန်ပို့လွှတ်ဖြန့်ဖြူးနိုင်ရေးအတွက် ပြန်လည်ပြင်ဆင် တည်ဆောက်မှု များပြုလုပ်လျက်ရှိတယ်လို့ အသိပေးခဲ့ပါတယ်။ ထိုသို့ ဆောင်ရွက်လျက်ရှိခြင်းကို နေပြည်တော်တွင် လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး၊ မန္တလေးတိုင်းဒေသကြီးမှာ လျှပ်စစ်စွမ်းအားဝန်ကြီးဌာန ဒုတိယဝန်ကြီးတို့ဦးစီးကာ စီမံဆောင်ရွက်လျက်ရှိတယ်လို့ အသိပေးခဲ့ပါတယ်။ ဒါကြောင့် လက်ရှိအချိန်၌ လျှပ်စစ်ဓာတ်အားပြတ်တောက်မှုများဖြစ်ပေါ်လျက်ရှိနေခြင်းကို ပြည်သူ များအနေဖြင့် နားလည်ပေးပါရန်လည်း လျှပ်စစ်စွမ်းအားဝန်ကြီးဌာနက အသိပေးခဲ့ပါတယ်။ (NVS 004)