မတ်လ ၂၈ ရက်က လှုပ်ခတ်ခဲ့တဲ့ ငလျင်ဒဏ်ကို ကြီးမားစွာခံစားခဲ့ရတဲ့ မန္တလေးတိုင်းဒေသကြီးမှာ လက်ရှိ အချိန်အထိ သေဆုံးသူ ၇၀၀ နီးပါး၊ ဒဏ်ရာရသူ ၁,၆၀၀ ကျော် နှင့် ပျောက်ဆုံးသူ ၆၀ ကျော် ရှိလာနေပြီး နေအိမ်ပေါင်း ၁,၅၀၀ ကျော် ပျက်စီးဆုံးရှုံးခဲ့တယ်လို့ နစကရဲ့ သတင်းထုတ်ပြန်ချက်အရ သိရပါတယ်။ မတ်လ ၂၉ ရက် မနက်ပိုင်းက နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် နှင့် အဖွဲ့ဝင်များက ငလျင်ဒဏ်ကြောင့် ထိခိုက်ပျက်စီးဆုံးရှုံးခဲ့ရတယ်လို့ သိရပါတယ်။ လက်ရှိအချိန်အထိ မန္တလေးတိုင်း ဒေသကြီးမှ နောက်ဆုံးကောက်ယူရရှိသောစာရင်းများအရ ငလျင်ဒဏ်ကြောင့် သေဆုံးခဲ့ရသူ ၆၉၄ ဦး၊ ဒဏ်ရာရရှိသူ ၁,၆၄၀ ဦး၊ပျောက်ဆုံးနေသူ ၆၈ ဦး၊ နေအိမ် ၁,၅၉၁ လုံး၊ ဘုန်းတော်ကြီးကျောင်း ၆၇၀ ကျောင်း၊ စာသင်ကျောင်း ၆၀ ကျောင်း၊ တံတား ၃ ခု၊ ဘုရားစေတီ ၂၉၀ ခုတို့ ပျက်စီးဆုံးရှုံးခဲ့ကြောင်းနှင့် အသေးစိတ်စာရင်းအား ဆက်လက် ကောက်ယူလျက်ရှိတယ်လို့ သိရပါတယ်။ လက်ရှိမှာ မန္တလေးမြို့နယ်အားလုံးမှာ အပျက်အစီးအများအပြားရှိနေခြင်းနှင့်လူသေဆုံးမှုများ၊ ထိခိုက် ဒဏ်ရာရရှိမှုများကို ရှာဖွေကူညီကယ်ဆယ်ရေးအတွက် သက်ဆိုင်ရာတာဝန်ရှိသူများ၊ လူမှုရေးအဖွဲ့အစည်းများ၊ ပြည်သူများအားလုံး ပူးပေါင်းဆောင်ရွက်နေသော်လည်း ဒဏ်ရာရရှိသူများကို ဆေးကုသနိုင်မှုများအတွက် အခက်အခဲ များရှိနေသေးတယ်လို့ သိရပါတယ်။ ထို့အတူ မန္တလေးမြို့ပေါ်၌ ယခုချိန်အထိ လျှပ်စစ်မီးမရသေးသလို ဖုန်းဆက်သွယ်ရေးအတွက်လည်း ခက်ခဲ နေပြီး ဝိုင်ဖိုင်မရကြောင်း၊ စက်သုံးဆီဆိုင်များလည်းအချို့မှာလည်းပိတ်ထားခြင်းနှင့် ဖွင့်လှစ်သည့်ဆိုင်များတွင်လည်း တန်းစီနေကြရတဲ့ အခြေအနေတွေရှိသလို ဘဏ်များနှင့် ATM စက်များမှာပါ ငွေထုတ်ရခက်ခဲတဲ့ အခြေအနေတွေပါ ဖြစ်ပေါ်နေကြောင်း သိရပါတယ်။(NVS 004)