ငလျင်ဒဏ်ခံစားနေရတဲ့ဒေသများကို ကူညီထောက်ပံ့မှုများ လုပ်ဆောင်နိုင်ရန်အတွက် အိန္ဒိယနိုင်ငံမှ ထောက်ပံ့ ရေးပစ္စည်းများတင်ဆောင်လာတဲ့ ထောက်ပံ့ရေး လေယာဉ်ဟာ မတ်လ ၂၉ ရက် နံနက် ၈ နာရီ မိနစ် ၄၀ မှာ ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိခဲ့ကြောင်း သိရပါတယ်။ အဆိုပါ ထောက်ပံ့ရေးလေယဉ်ဟာ KC-3805 လေယာဉ်အမျိုးအစား C-130J လေယာဉ်ဖြစ်ပြီး အိန္ဒိယနိုင်ငံ၊ Handon Airport ၊ Handon Air force Station ကနေ ထွက်ခွာလာခဲ့တာ ဖြစ်တယ်လို့ သိရပါတယ်။ ထောက်ပံ့ရေး ပစ္စည်းများ တင်ဆောင်လာတဲ့လေယာဥ်ကို ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ ရန်ကုန်တိုင်းဒေသကြီး လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးဝင်းတင့်၊ ရန်ကုန်မြို့တော် စည်ပင်သာယာရေး ကော်မတီဥက္ကဋ္ဌ (မြို့တော်ဝန်) ဦးဗိုလ်ဌေးနှင့်တာဝန်ရှိသူများ၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီး ဌာန၊ ဘေးအန္တရာယ်စီမံခန့်ခွဲမှုဦးစီးဌာနမှ ညွှန်ကြားရေးမှူး ဦးသန်းစိုး နှင့် တာဝန်ရှိသူများ၊ မြန်မာနိုင်ငံဆိုင်ရာ အိန္ဒိယသံရုံးမှ သံအမတ်ကြီး H.E Mr. Vinay Kumar နှင့်တာဝန်ရှိသူများက ကြိုဆိုလွှဲပြောင်းလက်ခံရယူခဲ့ကြပါတယ်။ အဆိုပါလေယာဉ်မှာ ထောက်ပံ့ရေးပစ္စည်းများကတော့ ခေါက်ဆွဲခြောက်၊ solar မီးအိမ်၊ မီးဖိုချောင်သုံးပစ္စည်း၊ တစ်ကိုယ်ရည်သုံးပစ္စည်း၊ မီးစက်၊ ဆေးရုံသုံးပစ္စည်း၊ တာပေါ်လင်၊ စောင်၊ ခြင်ထောင်၊ အိပ်ယာခင်းနှင့် ပလပ်စတစ် အိတ်မျိုးစုံ တို့အပါအဝင် စုစုပေါင်းပစ္စည်းအရေအတွက် ၂,၀၃၉ ထုတ်၊ ၁၅ ဒသမ ၃ တန်ရှိကြောင်းသိရပြီး ထောက်ပံ့ရေးပစ္စည်းများကို မရမ်းကုန်းမြို့နယ်၊ ကျိုက်ဝိုင်းဘုရားလမ်းရှိ ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန၊ ဗဟိုသိုလှောင်ရေးရုံသို့ ဆက်လက်သယ်ဆောင်သွားမည်ဖြစ်တယ်လို့ သိရပါတယ်။(NVS 004)