ငလျင်ကြောင့် လက်ရှိအချိန်အထိ သေဆုံးသူ ၁၄၀ ကျော်နှင့် ဒဏ်ရာရရှိထားသူ စုစုပေါင်း ၇၀၀ ကျော်ရှိတယ်လို့ နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် က နိုင်ငံပိုင်မီဒီယာများမှတစ်ဆင့် မတ်လ ၂၈ ရက်ညပိုင်းက ပြောကြားလိုက်ပါတယ်။ ပြင်းထန်စွာ ငလျင်လှုပ်ခတ်မှုကြောင့် လက်ရှိအချိန်အထိ သေဆုံးသူ စုစုပေါင်း ၁၄၄ ဦးရှိလာနေပြီး သေဆုံးသူများမှာ မန္တလေး (ကျောက်ဆည်)တွင် ၃၀ ဦး၊ နေပြည်တော်တွင် ၉၆ ဦး၊ စစ်ကိုင်းတွင် ၁၈ ဦး ရှိတယ်လို့ သိရပါတယ်။ ထို့အတူ ဒဏ်ရာရရှိထားသူများအဖြစ် မန္တလေး(ကျောက်ဆည်)တွင် စိစစ်ဆဲဖြစ်ကာ နေပြည်တော်တွင် ၄၃၂ ဦး၊ စစ်ကိုင်းတွင် ၃၀၀ ဦး၊ စုစုပေါင်း ၇၃၂ ဦးရှိပြီး သေဆုံးသူနှင့် ဒဏ်ရာရသူများ တိုးမြင့်လာနိုင်ကြောင်းလည်း ဆက်လက် ပြောကြားထားပါတယ်။ ဒါ့အပြင် ငလျင်ဒဏ်ခံစားခဲ့ရတဲ့ဒေသအားလုံးရှိ ထိခိုက်ပျက်စီးခဲ့ရသော အဆောက်အဦးများနဲ့ပတ်သက်၍လည်း ကူညီကယ်ဆယ်ရေးများလုပ်ဆောင်နိုင်ရန် ညွှန်ကြားထားပြီး ငလျင်ဒဏ်သင့် နေရာများအတွက် ကူညီကယ်ဆယ်ရေး လုပ်ငန်းများ ကျယ်ပြန့်စွာလုပ်ဆောင်သွားမှာမို့ ပြည်သူများ ပူးပေါင်းဆောင်ရွက်ပေးပါရန်လည်း နစက ဥက္ကဋ္ဌက မေတ္တာရပ်ခံထားပါတယ်။ မိမိအနေဖြင့်လည်း ငလျင်ဒဏ်သင့် ဒေသအားလုံးကို အရေးပေါ်အခြေအနေကြေညာထားကာ ပြည်ပအကူအညီများ ပေးနိုင်ဖို့ အကုန်လမ်းဖွင့်ထားပြီး မကြာသေးမီကပဲ AHA စင်တာက မနက်ဖြန်တွင် အရေးပေါ်ကယ်ဆယ်ရေးပစ္စည်းတွေပို့ဖို့ နှင့် အိန္ဒိယနိုင်ငံမှလည်း ကူညီကယ်ဆယ်ရေးပစ္စည်းတွေပို့ဖို့ ကမ်းလှမ်းလာမှုများကို ခွင့်ပြုပေးထားပြီး မည်သည့် နိုင်ငံ၊ မည်သည့်အဖွဲ့အစည်းမဆို၊ မြန်မာနိုင်ငံအတွင်းရှိတဲ့ ရဟန်းရှင်လူပြည်သူများ မည်သူမဆို လာရောက်ကူညီနိုင်ဖို့လည်း ဖိတ်ကြားထားတယ်လို့ နစက ဥက္ကဋ္ဌက ပြောကြားပါတယ်။ မတ်လ ၂၈ ရက်နေ့လယ်ပိုင်းက လှုပ်ခတ်ခဲ့တဲ့ ပြင်းထန်သည့်ငလျင်ကြောင့် စစ်ကိုင်းတိုင်းဒေသကြီး၊ မန္တလေး တိုင်းဒေသကြီး၊ မကွေးတိုင်းဒေသကြီးနှင့် ရှမ်းပြည်နယ်အရှေ့မြောက်ဒေသ၊ နေပြည်တော်ကောင်စီနယ်မြေနှင့် ပဲခူးတိုင်းဒေသကြီးတို့၌ ငလျင်ဒဏ်သင့်ခဲ့ရပြီး အဆိုပါဒေသများကို အရေးပေါ်အခြေအနေအဖြစ် အမျိုးသားသဘာဝ ဘေးအန္တရာယ်ဆိုင်ရာစီမံခန့်ခွဲမှုကော်မတီမှ ကြေညာထားပါတယ်။ (NVS 004)