“၂၀၂၆ ကမ္ဘာ့ဖလားမှာ မက်ဆီပါဝင်ရန် မျှော်လင့်နေတဲ့ နည်းပြ စကာလိုနီ”
28 Mar
လာမယ့် ၂၀၂၆ ကမ္ဘာ့ဖလားပြိုင်ပွဲမှာ တိုက်စစ်မှူး မက်ဆီ ပါဝင်ကစားနိုင်ဖို့ မျှော်လင့်ထားသလို လက်ရွေးစင် အသင်းမှာ မက်ဆီ အတွက် နေရာတစ်ခုချန်ထားပေးသွားမှာ ဖြစ်တယ်လို့ အာဂျင်တီးနားနည်းပြ စကာလိုနီ က ပြောကြားသွားခဲ့ပါတယ်။ အသက် ၃၇ နှစ်အရွယ် မက်ဆီ ဟာ ဒဏ်ရာပြဿနာကြောင့် အခုမတ်လအတွင်းမှာ ကစားခဲ့တဲ့ အာဂျင်တီးနား အသင်းရဲ့ ကမ္ဘာ့ဖလားခြေစစ်ပွဲစဉ် ၂ ပွဲကို လွဲချော်ခဲ့တာ ဖြစ်ပါတယ်။ အခုလ ကမ္ဘာ့ဖလားခြေစစ်ပွဲတွေအပြီးမှာ အာဂျင်တီးနားအသင်းဟာ ၂၀၂၆ ကမ္ဘာ့ဖလားပြိုင်ပွဲဝင်ခွင့်ရဖို့ သေချာခဲ့ပြီးနောက် မက်ဆီ အနေနဲ့ ကမ္ဘာ့ဖလားပြိုင်ပွဲဝင် အာဂျင်တီးနားအသင်းမှာ ပါဝင်လာနိုင်မလားဆိုတာက မေးခွန်းတစ်ခုဖြစ်လာခဲ့ပါတယ်။ နည်းပြ စကာလိုနီ က ၂၀၂၆ ကမ္ဘာ့ဖလားပြိုင်ပွဲအတွက် ပြောဖို့က စောနေသေးသလို လက်ရွေးစင် အသင်းနဲ့ ပတ်သက်တဲ့ ဆုံးဖြတ်ချက်အတွက် မက်ဆီကို လွတ်လွတ်လပ်လပ် ဆုံးဖြတ်ခွင့်ပေးထားပါတယ်လို့ ပြောကြားသွား ခဲ့ပါတယ်။ ၂၀၂၂ ကမ္ဘာ့ဖလားပြိုင်ပွဲမှာ အာဂျင်တီးနား အသင်းကို ချန်ပီယံဖြစ်အောင် ဦးဆောင်ပေးနိုင်ခဲ့ပြီးနောက်ပိုင်း မက်ဆီဟာ ဒဏ်ရာပြဿနာတွေနဲ့အတူ ရုန်းကန်နေခဲ့ရပြီး အင်တာမိုင်ယာမီအသင်းနည်းပြ မာရှေယာနို က မက်ဆီ ရဲ့ ကြံ့ခိုင်မှုအခြေအနေကို ကြည့်ပြီး ပွဲတွေမှာအသုံးပြုဖို့ကို စဉ်းစားသွားရမှာ ဖြစ်တယ်လို့ ပြောကြားထားပါတယ်။ (NVS 008)
