ရုရှားနိုင်ငံနှင့်မြောက်ကိုရီးယားနိုင်ငံတို့သည် နှစ်နိုင်ငံကြားတည်ရှိသည့် တူမင်မြစ်ကူးတံတားတစ်စင်း တည်ဆောက်ရန် စီစဉ်ထားကြောင်း မတ်လ ၂၇ ရက်သတင်းများတွင် ဖော်ပြထားသည်။ တူမင်မြစ်ကူးတံတားကို မကြာမီကာလတွင် စတင်တည်ဆောက်မည်ဖြစ်ကြောင်း မြောက်ကိုရီးယားနိုင်ငံဆိုင်ရာ ရုရှားသံအမတ်ကြီးက ရုရှားပြည်တွင်း မီဒီယာများသို့ ထုတ်ဖော်ပြောကြားခဲ့သည်။ တူမင်မြစ်ကူးတံတားတည်ဆောက်ရေး သဘောတူညီချက်ကို ၂၀၂၄ ခုနှစ်အတွင်း မြောက်ကိုရီးယား နိုင်ငံသို့ ရုရှားသမ္မတပူတင် သွားရောက်စဉ် နှစ်နိုင်ငံတာဝန်ရှိသူများက ရယူခဲ့ကြခြင်းဖြစ်သည်။ တူမင်မြစ်ကူး တံတားသစ်ကို လက်ရှိ တည်ရှိနေသည့် ရုရှား-မြောက်ကိုရီးယား ချစ်ကြည်ရေး မြစ်ကူးရထားတံတား အနီးမှာပင် တည်ဆောက်မည်ဖြစ်ကြောင်း ရုရှား မီဒီယာများ၏အဆိုအရ သိရသည်။ အဆိုပါ တူမင်မြစ်ကူးရထားတံတားကို ကိုရီးယားကျွန်းဆွယ်စစ်ပွဲပြီးဆုံးပြီးနောက် ၁၉၅၉ ခုနှစ် က တည်ဆောက်ခဲ့ခြင်းဖြစ်သည်။ အရှည် မီတာ ၈၅၀ ရှိမည့် တူမင်မြစ်ကူးတံတားသစ်ကို ရုရှားနိုင်ငံ၏ အဝေးပြေး လမ်းစနစ်နှင့် ချိတ်ဆက်ထားမည်ဖြစ်ကြောင်း RT သတင်းဌာနဖော်ပြချက်အရ သိရသည်။