“ပြင်သစ်နိုင်ငံခြားရေးဝန်ကြီး ဘားရော့ တရုတ်နိုင်ငံပေကျင်းမြို့သို့ရောက်ရှိ”
28 Mar
ပြင်သစ်နိုင်ငံခြားရေးဝန်ကြီး ယန်နိုအယ်လ်ဘားရော့သည် မတ်လ ၂၇ ရက်တွင် နှစ်ရက်ကြာ တရုတ်ခရီးစဉ် ကို စတင်ခဲ့ကြောင်း သိရသည်။ ပြင်သစ်နိုင်ငံခြားရေးဝန်ကြီး ဘားရော့သည် တရုတ်နိုင်ငံခြားရေးဝန်ကြီး ဝမ်ယိနှင့် မတ်လ ၂၇ ရက်မှာပင် ပေကျင်းမြို့၌ တွေ့ဆုံဆွေးနွေးမည် ဖြစ်သည်။ တရုတ်နိုင်ငံခြားရေးဝန်ကြီး ဝမ်ယိနှင့် တွေ့ဆုံစဉ် ပြင်သစ်နိုင်ငံခြားရေးဝန်ကြီး ဘားရော့ သည် ယူကရိန်း ပြဿနာ၊ တရုတ် နှင့် ဥရောပတို့ကြား ကုန်သွယ်ရေး အငြင်းပွားမှုပြဿနာများကို အဓိကထားဆွေးနွေးမည် ဖြစ်သည်။ ယူကရိန်းကို ဆက်လက်ကူညီရေးနှင့်ပတ်သက်၍ ဥရောပနှင့်အမေရိကန်နိုင်ငံတို့ကြား သဘောထား ကွဲလွဲ နေချိန်တွင် ပြင်သစ်နိုင်ငံခြားရေးဝန်ကြီးဘားရော့ တရုတ်နိုင်ငံသို့ရောက်ရှိနေခြင်း ဖြစ်သည်။ ပြင်သစ်နိုင်ငံသည် ယူကရိန်းစစ်ပွဲကာလအတွင်း ယူကရိန်း အစိုးရကို အခိုင်အမာထောက်ခံအားပေးခဲ့သောနိုင်ငံ ဖြစ်သည်။ သို့ရာတွင် တရုတ်နိုင်ငံကမူ ရုရှားနိုင်ငံကို သံတမန်ဆက်ဆံရေးအရ ထောက်ခံအားပေးခဲ့ပြီး ရုရှားသဘာဝသယံဇာတများကို ဝယ်ယူပေးခြင်းဖြင့် ရုရှားအစိုးရကို စီးပွားရေးအရ ထွက်ပေါက်ဖွင့်ပေးထားကြောင်း ဆင်ဟွာသတင်းဌာန၏ ဖော်ပြချက်အရ သိရသည်။
