တိုင်းဒေသကြီးနဲ့ပြည်နယ်တွေမှာ လူငယ်စင်တာတွေဖွင့်လှစ်သွားဖို့ဆောင်ရွက်လျက်ရှိရာ မတ်လ ၂၃ ရက်က ရန်ကုန်တိုင်းဒေသကြီး၊ သာကေတမြို့နယ်အတွင်းမှာ ပထမဆုံးလူငယ်စင်တာတစ်ခုကိုဖွင့်လှစ်ပေးခဲ့ပြီးနောက် ဒုတိယမြောက် လူငယ်စင်တာကို မကွေးတိုင်းဒေသကြီးမှာ ထပ်မံဖွင့်လှစ်ခဲ့တယ်လို့ သိရပါတယ်။ အဆိုပါလူငယ်စင်တာကို မကွေးတက္ကသိုလ်ဝန်းအတွင်း မတ်လ ၂၆ ရက်ကဖွင့်လှစ်ခဲ့တာဖြစ်ပြီး လူငယ် စင်တာမှာ အားကစား၊ ပန်းချီ၊ ဂီတအစရှိတဲ့အနုပညာခန်းမ၊ အိမ်တွင်းလက်မှုပညာ၊ မုန့်လုပ်သင်တန်း၊ IT နည်းပညာနဲ့ ဘာသာစကားပြောသင်တန်းခန်းမ၊ ကွန်ပျူတာသင်တန်းခန်းမ၊ စာဖတ်ခန်းစတာတွေ ပါဝင်တယ်လို့ သိရပါတယ်။ လူငယ်စင်တာကို မကွေးတိုင်းအတွင်းက အသက် ၁၅ နှစ်ကနေ ၃၅ နှစ်အတွင်းရှိလူငယ်တွေ လာရောက် လေ့လာနိုင်တယ်လို့သိရပါတယ်။ လူငယ်စင်တာဖွင့်ပွဲ အထိမ်းအမှတ်အဖြစ် လူငယ်ရေးရာအသိပညာပေး ဟောပြော ပွဲကိုလည်း ထည့်သွင်းကျင်းပခဲ့ပါတယ်။ လူငယ်စင်တာဖွင့်ပွဲအခမ်းအနားသို့ မကွေးတိုင်းဒေသကြီး အစိုးရအဖွဲ့ဝန်ကြီးချုပ် ဦးတင့်လွင်နဲ့ အစိုးရအဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိသူများ၊ ကျောင်းသား/ကျောင်းသူများ တက်ရောက်ခဲ့ကြတယ်လို့ သိရပါတယ်။ (NVS 004)