“ရခိုင်ပြည်နယ်မှ ပြောင်းရွှေ့လာတဲ့ ပြည်သူများအဆင်ပြေစေရန် လဝကရုံးများကို တွဲဖက်ဖွင့်လှစ်ပေးထား”
28 Mar
ရခိုင်ပြည်နယ်မှ အကြောင်းအမျိုးမျိုးဖြင့် ပြောင်းရွှေ့လာရသည့် ပြည်သူများ အဆင်ပြေစေရန် ယင်းမြို့များရှိ လဝကရုံးများကို ရန်ကုန်မြို့ရှိ လဝက ရုံးများတွင် တွဲဖက်ဖွင့်လှစ်ပေးထားကြောင်း သိရပါတယ်။ လက်ရှိမှာ ရခိုင်ပြည်နယ်ရှိ မြို့နယ်များမှ လူဝင်မှုကြီးကြပ်ရေးနှင့်အမျိုးသားမှတ်ပုံတင်ရေးဦးစီးဌာန (လဝက) ရုံးများကို ဗဟန်းမြို့နှင့် သာကေတမြို့တို့တွင် ဖွင့်လှစ်ထားခြင်းဖြစ်ပြီး နိုင်ငံသားစိစစ်ရေးကတ်ပြားအပါအဝင် အိမ်ထောင်စုစာရင်းနှင့် သက်ဆိုင်သော စာရွက်၊ စာတမ်းများကို ပြုလုပ်ပေးလျက်ရှိနေခြင်းလည်း ဖြစ်ပါတယ်။ လဝကရုံးများနှင့် နီးစပ်သူတစ်ဦး ပြောကြားချက်အရ ရခိုင်ရှိ မြို့နယ်အလိုက် ရုံးများကို ဗဟန်းမြို့နယ် အမှတ် ၃ လမ်းရှိ ဓမ္မာရုံမှာ စုပေါင်းပြီး ဖွင့်ပေးထားကာ ရမ်းဗြဲကျွန်းအတွက်ကိုမူ သာကေတ(လဝက) ရုံးမှာ တွဲဖက်ဖွင့်လှစ် ထားတယ်လို့ သိရပါတယ်။ လက်ရှိမှာ ရန်ကုန်သို့ရောက်ရှိလာသော ရခိုင်ဒေသခံများက နိုင်ငံသားစိစစ်ရေးကဒ်ပြား အပါအဝင် အိမ်ထောင်စုစာရင်းများ အသစ်လဲခြင်း၊ ဖြည့်စွက်ခြင်းများပြုလုပ်ရန် လဝကရုံးများမှာ သွားရောက် လုပ်ဆောင်နေကြောင်းလည်း သိရပါတယ်။ (NVS 004)
