ရန်ကုန်ဆိပ်ကမ်းမှာ ကုန်သေတ္တာ TEU ၂,၆၀၀ အထိ သယ်ဆောင်နိုင်ပြီး ရေစူး ၁၀ ဒသမ ၅ မီတာအထိရှိသည့် တန်ချိန် ၅၀,၀၀၀ သင်္ဘောကြီးများ ဝင်/ထွက် လက်ခံဝန်ဆောင်မှုပေးလာနိုင်ပြီဖြစ်ကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးအောင်ကျော်ထွန်းက မြန်မာ့ဆိပ်ကမ်းအာဏာပိုင်မှ ဦးဆောင်ပြုလုပ်တဲ့ ပထမအကြိမ် ရေယာဉ်လွှဲပြောင်းတင်ဆောင်ခြင်း (Transshipment) လုပ်ငန်းစဉ် စတင်ခြင်း အခမ်းအနားမှာ ပြောကြားခဲ့ခြင်းဖြစ်ပါတယ်။ မြန်မာနိုင်ငံက ပထဝီအနေအထားအရ တောင်အာရှနှင့် အရှေ့တောင်အာရှဒေသတွင်း နိုင်ငံများကို ချိတ်ဆက် ပေးနိုင်တဲ့ အနေအထားတွင်ရှိကြောင်း၊ ရန်ကုန်ဆိပ်ကမ်းသည် အိန္ဒိယသမုဒ္ဒရာနှင့် ဆက်စပ်ကမ်းရိုးတန်း တစ်လျှောက်ရှိ ဆိပ်ကမ်းများသို့ ရေယာဉ်လွှဲပြောင်းတင်ဆောင်ခြင်း (Transshipment) နည်းလမ်းကို အသုံးပြုပြီး ဒေသတွင်းကြားခံဆိပ်ကမ်း (Transit Port) အဖြစ်ဆောင်ရွက်နိုင်မည့် အနေအထားရှိကြောင်း ဒုတိယဝန်ကြီးက ပြောကြားခဲ့ပါတယ်။ ဆက်လက်ပြီး ရေယာဉ်လွှဲပြောင်းတင်ဆောင်ခြင်းလုပ်ငန်းများ ဆောင်ရွက်လာနိုင်မည်ဆိုပါက နိုင်ငံရဲ့ အဓိက ပို့ကုန်များဖြစ်သော ပဲနှင့် ပြောင်းဈေးကွက်ဝေစုပိုမိုရရှိပြီး တင်ပို့နိုင်လာမည်ဖြစ်ကြောင်း၊ ရန်ကုန်ဆိပ်ကမ်းအနေနဲ့ လက်ရှိကုန်သေတ္တာကိုင်တွယ် ရရှိမှုပမာဏ တစ်နှစ် TEU ရှစ်သိန်း ပမာဏထက် ပိုမိုတိုးတက်ကိုင်တွယ်လာနိုင်မည် ဖြစ်၍ နိုင်ငံအတွက် ဆိပ်ကမ်းဝင်ငွေတိုးတက်ရရှိလာမည်ဖြစ်ကြောင်း သိရပါတယ်။ (NVS 004)